dil ke sahra mein koi aas ka jugnu bhi nahin

dil ke sahrā meñ koī aas kā jugnū bhī nahīñ

itnā royā huuñ ki ab aañkh meñ aañsū bhī nahīñ

itnī be-rahm na thī ziist kī dopahr kabhī

in ḳharāboñ meñ kahīñ sāya-e-gesū bhī nahīñ

kāsa-e-dard liye phirtī hai gulshan kī havā

mere dāman meñ tire pyaar kī ḳhushbū bhī nahīñ

chhin gayā merī nigāhoñ se bhī ehsās-e-jamāl

terī tasvīr meñ pahlā sā vo jaadū bhī nahīñ

mauj-dar-mauj tire ġham kī shafaq khiltī hai

mujh ko is silsila-e-rañg pe qaabū bhī nahīñ

dil vo kam-baḳht ki dhaḌke hī chalā jaatā hai

ye alag baat ki tū zīnat-e-pahlū bhī nahīñ

ye ajab rāhguzar hai ki chaTāneñ to bahut

aur sahāre ko tirī yaad ke baazū bhī nahīñ

hādisa ye bhī guzartā thā mirī jaañ ham par

paikar-e-sañg haiñ do, maiñ bhī nahīñ tū bhī nahīñ

dil ke sahra mein koi aas ka jugnu bhi nahin

itna roya hun ki ab aankh mein aansu bhi nahin

itni be-rahm na thi zist ki dopahr kabhi

in KHarabon mein kahin saya-e-gesu bhi nahin

kasa-e-dard liye phirti hai gulshan ki hawa

mere daman mein tere pyar ki KHushbu bhi nahin

chhin gaya meri nigahon se bhi ehsas-e-jamal

teri taswir mein pahla sa wo jadu bhi nahin

mauj-dar-mauj tere gham ki shafaq khilti hai

mujh ko is silsila-e-rang pe qabu bhi nahin

dil wo kam-baKHt ki dhaDke hi chala jata hai

ye alag baat ki tu zinat-e-pahlu bhi nahin

ye ajab rahguzar hai ki chaTanen to bahut

aur sahaare ko teri yaad ke bazu bhi nahin

hadisa ye bhi guzarta tha meri jaan hum par

paikar-e-sang hain do, main bhi nahin tu bhi nahin