dil ke virane ko mahfil ki taraf le chaliye

dil ke vīrāne ko mahfil kī taraf le chaliye

kyuuñ samundar ko na sāhil kī taraf le chaliye

āshnā rāz-e-haqīqat se tabhī hoñge ham

har haqīqat ko jo bātil kī taraf le chaliye

us kī talvār kī tārīf sunūñ maiñ kab tak

pahle mujh ko mire qātil kī taraf le chaliye

maut manzil hai masīhā kī to phir kyā kahnā

zindagī ko usī mahfil kī taraf le chaliye

kaaba o dair ke gumrāhoñ kā anjām hī kyā

yahī behtar hai unheñ dil kī taraf le chaliye

log mushkil ko jab āsānī kī jānib le jaa.eñ

aap āsānī ko mushkil kī taraf le chaliye

sair-e-mahtāb bahut ḳhuub sahī phir bhī 'niyāz'

dil ko mahtāb-e-shamā.il kī taraf le chaliye

dil ke virane ko mahfil ki taraf le chaliye

kyun samundar ko na sahil ki taraf le chaliye

aashna raaz-e-haqiqat se tabhi honge hum

har haqiqat ko jo baatil ki taraf le chaliye

us ki talwar ki tarif sunun main kab tak

pahle mujh ko mere qatil ki taraf le chaliye

maut manzil hai masiha ki to phir kya kahna

zindagi ko usi mahfil ki taraf le chaliye

kaba o dair ke gumrahon ka anjam hi kya

yahi behtar hai unhen dil ki taraf le chaliye

log mushkil ko jab aasani ki jaanib le jaen

aap aasani ko mushkil ki taraf le chaliye

sair-e-mahtab bahut KHub sahi phir bhi 'niyaz'

dil ko mahtab-e-shamail ki taraf le chaliye