dil ke virane ko yun aabaad kar lete hain hum

dil ke vīrāne ko yuuñ ābād kar lete haiñ ham

kar bhī kyā sakte haiñ tujh ko yaad kar lete haiñ ham

jab buzurgoñ kī duā.eñ ho ga.iiñ be-kār sab

qarz-e-ḳhvāb-āvar se dil ko shaad kar lete haiñ ham

talḳhi-e-kām-o-dahan kī ābyārī ke liye

dāvat-e-shīrāz-e-abr-o-bād kar lete haiñ ham

dekh kar dhabbe lahū ke dast-e-ādam-zād par

taarī apne zehn par ilhād kar lete haiñ ham

kaun suntā hai bhikārī kī sadā.eñ is liye

kuchh zarīfāna latīfe yaad kar lete haiñ ham

jab purānā lahja kho detā hai apnī tāzgī

ik na.ī tarz-e-navā ījād kar lete haiñ ham

dekh kar ahl-e-qalam ko kushta-e-āsūdgī

ḳhud ko 'vāmiq' farz ik naqqād kar lete haiñ ham

dil ke virane ko yun aabaad kar lete hain hum

kar bhi kya sakte hain tujh ko yaad kar lete hain hum

jab buzurgon ki duaen ho gain be-kar sab

qarz-e-KHwab-awar se dil ko shad kar lete hain hum

talKHi-e-kaam-o-dahan ki aabyari ke liye

dawat-e-shiraaz-e-abr-o-baad kar lete hain hum

dekh kar dhabbe lahu ke dast-e-adam-zad par

tari apne zehn par ilhad kar lete hain hum

kaun sunta hai bhikari ki sadaen is liye

kuchh zarifana latife yaad kar lete hain hum

jab purana lahja kho deta hai apni tazgi

ek nai tarz-e-nawa ijad kar lete hain hum

dekh kar ahl-e-qalam ko kushta-e-asudgi

KHud ko 'wamiq' farz ek naqqad kar lete hain hum