dil ke zaKHmon ki chubhan dida-e-tar se puchho

dil ke zaḳhmoñ kī chubhan dīda-e-tar se pūchho

mere ashkoñ kā hai kyā mol guhar se pūchho

ghar jalā baiThe charāġhoñ kī havas meñ āḳhir

ghar kī qīmat to kisī ḳhāk-basar se pūchho

ye to ma.alūm hai maiñ samt-e-safar kho baiThī

tum isī baat ko andāz-e-digar se pūchho

ret uḌtī hai sujhā.ī nahīñ detā kuchh bhī

kaT sakegī kabhī ye raat sahar se pūchho

yuuñ to majnūñ bhī huā kohkan o mansūr hue

ghāyal ab kaun huā tīr-e-nazar se pūchho

log kahte haiñ mujhe sañg-e-sar-e-rah 'bushrā'

qadr-o-qīmat mirī kuchh ahl-e-hunar se pūchho

dil ke zaKHmon ki chubhan dida-e-tar se puchho

mere ashkon ka hai kya mol guhar se puchho

ghar jala baiThe charaghon ki hawas mein aaKHir

ghar ki qimat to kisi KHak-basar se puchho

ye to malum hai main samt-e-safar kho baiThi

tum isi baat ko andaz-e-digar se puchho

ret uDti hai sujhai nahin deta kuchh bhi

kaT sakegi kabhi ye raat sahar se puchho

yun to majnun bhi hua kohkan o mansur hue

ghayal ab kaun hua tir-e-nazar se puchho

log kahte hain mujhe sang-e-sar-e-rah 'bushra'

qadr-o-qimat meri kuchh ahl-e-hunar se puchho