dil khol kar hansen na to aansu bahaen log

dil khol kar hañseñ na to aañsū bahā.eñ log

chīḳhoñ ko phir batāo ki kaise dabā.eñ log

rahnā paḌegā aise hī tā-zindagī hameñ

jo din guzar ga.e haiñ unheñ bhuul jaa.eñ log

lāshoñ ke is hujūm meñ ik fikr ye bhī hai

kis ko utāreñ qabr meñ kis ko jalā.eñ log

pahle to dil se dil ko milāne kī baat thī

ab hukm ye huā hai ki duurī banā.eñ log

āsār-e-zindagī hī nahīñ zindagī meñ kuchh

jab dil hī bujh gayā ho to kyā muskurā.eñ log

bhūle se bhī na bhūlegā san do hazār biis

jo dil pe naqsh ho gayā kaise miTā.eñ log

tum ko ḳhudā ne dī hai jo lafzoñ kī saltanat

aisī ġhazal kaho ke jise gungunā.eñ log

rakhte nahīñ ho rishta kisī se bhī tum magar

ummīd ye ki tum se hī rishta nibhā.eñ log

daulat se bhī sukūn mayassar nahīñ huā

'nusrat' kā mashvara hai ki nekī kamā.eñ log

dil khol kar hansen na to aansu bahaen log

chiKHon ko phir batao ki kaise dabaen log

rahna paDega aise hi ta-zindagi hamein

jo din guzar gae hain unhen bhul jaen log

lashon ke is hujum mein ek fikr ye bhi hai

kis ko utaren qabr mein kis ko jalaen log

pahle to dil se dil ko milane ki baat thi

ab hukm ye hua hai ki duri banaen log

aasar-e-zindagi hi nahin zindagi mein kuchh

jab dil hi bujh gaya ho to kya muskuraen log

bhule se bhi na bhulega san do hazar bis

jo dil pe naqsh ho gaya kaise miTaen log

tum ko KHuda ne di hai jo lafzon ki saltanat

aisi ghazal kaho ke jise gungunaen log

rakhte nahin ho rishta kisi se bhi tum magar

ummid ye ki tum se hi rishta nibhaen log

daulat se bhi sukun mayassar nahin hua

'nusrat' ka mashwara hai ki neki kamaen log