دل کھول کر ہنسیں نہ تو آنسو بہائیں لوگ

دل کھول کر ہنسیں نہ تو آنسو بہائیں لوگ

چیخوں کو پھر بتاؤ کہ کیسے دبائیں لوگ

لاشوں کے اس ہجوم میں اک فکر یہ بھی ہے

کس کو اتاریں قبر میں کس کو جلائیں لوگ

پہلے تو دل سے دل کو ملانے کی بات تھی

اب حکم یہ ہوا ہے کہ دوری بنائیں لوگ

رہنا پڑے گا ایسے ہی تا زندگی ہمیں

جو دن گزر گئے ہیں انہیں بھول جائیں لوگ

آثار زندگی ہی نہیں زندگی میں کچھ

جب دل ہی بجھ گیا ہو تو کیا مسکرائیں لوگ

بھولے سے بھی نہ بھولے گا سن دو ہزار بیس

جو دل پہ نقش ہو گیا کیسے مٹائیں لوگ

دولت سے بھی سکون میسر نہیں ہوا

نصرتؔ کا مشورہ ہے کہ نیکی کمائیں لوگ