dil khoTa hai hum ko us se raaz-e-ishq na kahna tha

dil khoTā hai ham ko us se rāz-e-ishq na kahnā thā

ghar kā bhedī lanka Dhaa.e itnā samjhe rahnā thā

kyuuñ hañste ho maiñ jo barahna aaj junūñ ke hāthoñ huuñ

kuchh din guzre maiñ ne bhī bhī rañg libās ik pahnā thā

naza.a ke vaqt aa.e ho tum ab pūchh rahe ho kyā mujh se

hālat merī sab kah guzrī jo kuchh tum se kahnā thā

aa ke gayā vo royā kiin ye harj huā nazzāre meñ

āñkheñ kuchh nāsūr nahīñ thiiñ jin ko har dam bahnā thā

himmat haare jī de baiThe sab lazzat khoī ai 'shauq'

marne kī jaldī hī kyā thī ishq kā ġham kuchh sahnā thā

dil khoTa hai hum ko us se raaz-e-ishq na kahna tha

ghar ka bhedi lanka Dhae itna samjhe rahna tha

kyun hanste ho main jo barahna aaj junun ke hathon hun

kuchh din guzre main ne bhi bhi rang libas ek pahna tha

naza ke waqt aae ho tum ab puchh rahe ho kya mujh se

haalat meri sab kah guzri jo kuchh tum se kahna tha

aa ke gaya wo roya kin ye harj hua nazzare mein

aankhen kuchh nasur nahin thin jin ko har dam bahna tha

himmat haare ji de baiThe sab lazzat khoi ai 'shauq'

marne ki jaldi hi kya thi ishq ka gham kuchh sahna tha