dil KHush na hua zulf-e-pareshan se nikal kar

dil ḳhush na huā zulf-e-pareshāñ se nikal kar

pachhtā.e ham is shām-e-ġharībāñ se nikal kar

ye us se ziyāñ-kār to vo is se bad aa.eñ

jā.ūñ maiñ kahāñ gabr o musalmāñ se nikal kar

ustād koī zor milā qais ko shāyad

lī raah jo jangal kī dabistāñ se nikal kar

mā'lūm nahīñ mujh ko ki jāvegā kidhar ko

yuuñ siina tirā chāk-e-garebāñ se nikal kar

guzrā rag-e-gardan se ki juuñ sham' sar apnā

talvār hī khātā hai garebāñ se nikal kar

nā-zorī meñ aayā na kabhū tā-sar-e-mizhgāñ

yak qatra-e-ḳhūñ bhī bun-e-mizhgāñ se nikal kar

tīroñ meñ kamāñ-dār mirā gher le jis ko

vo jaane na paave kabhī maidāñ se nikal kar

ham aap fanā ho ga.e ai hasti-e-mauhūm

juuñ mauj-e-tabassum lab-e-jānāñ se nikal kar

sūrat ke tirī sāmne rah jaa.e hai kaise

har but kī nigah dīda-e-hairāñ se nikal kar

us dast-e-hinā.ī meñ rahā ā.īna aksar

dariyā na gayā panja-e-marjāñ se nikal kar

ab paḌh vo ġhazal 'mus.hafī' tū shusta o rafta

sunñe jise ḳhalq aa.e safāhāñ se nikal kar

dil KHush na hua zulf-e-pareshan se nikal kar

pachhtae hum is sham-e-ghariban se nikal kar

ye us se ziyan-kar to wo is se bad aaen

jaun main kahan gabr o musalman se nikal kar

ustad koi zor mila qais ko shayad

li rah jo jangal ki dabistan se nikal kar

ma'lum nahin mujh ko ki jawega kidhar ko

yun sina tera chaak-e-gareban se nikal kar

guzra rag-e-gardan se ki jun sham' sar apna

talwar hi khata hai gareban se nikal kar

na-zori mein aaya na kabhu ta-sar-e-mizhgan

yak qatra-e-KHun bhi bun-e-mizhgan se nikal kar

tiron mein kaman-dar mera gher le jis ko

wo jaane na pawe kabhi maidan se nikal kar

hum aap fana ho gae ai hasti-e-mauhum

jun mauj-e-tabassum lab-e-jaanan se nikal kar

surat ke teri samne rah jae hai kaise

har but ki nigah dida-e-hairan se nikal kar

us dast-e-hinai mein raha aaina aksar

dariya na gaya panja-e-marjaan se nikal kar

ab paDh wo ghazal 'mushafi' tu shusta o rafta

sunne jise KHalq aae safahan se nikal kar