dil ki aazadi to pabandi se hai

dil kī āzādī to pābandī se hai

gar vo pābandī razā-mandī se hai

tū samajhtā hai hunar-mandī se hai

qadr in’ām-e-ḳhudāvandī se hai

naam usī ka hai ḳhushī-o-ḳhurramī

jo mayassar un kī ḳhursandī se hai

hai ba-qadr-e-faiz insāñ ka faroġh

naḳhl kī qīmat birau-mandī se hai

aah vo farzand jo bā-‘ilm-o-fazl

be-ḳhabar ādāb-e-farzandī se hai

aur iḳhlās-e-‘amal hogā kahāñ

gar 'ibādat bhī ġharaz-mandī se hai

is qadar shiddat hamāre shauq meñ

un kī ḳhū-e-der-paivandī se hai

ai 'asad' nashv-o-numā-e-zindagī

dard-o-soz-e-ārzūmandī se hai

dil ki aazadi to pabandi se hai

gar wo pabandi raza-mandi se hai

tu samajhta hai hunar-mandi se hai

qadr in’am-e-KHudawandi se hai

nam usi ka hai KHushi-o-KHurrami

jo mayassar un ki KHursandi se hai

hai ba-qadr-e-faiz insan ka farogh

naKHl ki qimat birau-mandi se hai

aah wo farzand jo ba-‘ilm-o-fazl

be-KHabar aadab-e-farzandi se hai

aur iKHlas-e-‘amal hoga kahan

gar 'ibaadat bhi gharaz-mandi se hai

is qadar shiddat hamare shauq mein

un ki KHu-e-der-paiwandi se hai

ai 'asad' nashw-o-numa-e-zindagi

dard-o-soz-e-arzumandi se hai