dil ki barbaadi mein shamil thi raza aankhon ki

dil kī barbādī meñ shāmil thī razā āñkhoñ kī

is kī pādāsh meñ kaam aa.ī ziyā āñkhoñ kī

aañkh māhaul se jab tark-e-ta.alluq kar le

ġhaur kiije to vo hotī hai anā āñkhoñ kī

zer-e-lab mauj-e-tabassum na 'arūsāna libās

husn-e-ma.asūm kī pahchān hayā āñkhoñ kī

hāl-e-dil lafzoñ kā muhtāj hai ye kis ne kahā

koī samjhe to ye aañsū haiñ sadā āñkhoñ kī

ham ko le Dūbegā ye zāhir-o-bātin kā tazād

ruuh kā karb judā raah judā āñkhoñ kī

gauhar-e-ashk ko arzāñ nahīñ karte ye log

qadr pahchānte haiñ ahl-e-vafā āñkhoñ kī

āñkhoñ vāloñ ne uḌāyā hai añdheroñ kā mazāq

raushnī chhīn na le un se ḳhudā āñkhoñ kī

is ko kyā kahte haiñ 'iqbāl' maiñ kis se pūchhūñ

husn ḳhud dād-talab aur ḳhatā āñkhoñ kī

dil ki barbaadi mein shamil thi raza aankhon ki

is ki padash mein kaam aai ziya aankhon ki

aankh mahaul se jab tark-e-talluq kar le

ghaur kije to wo hoti hai ana aankhon ki

zer-e-lab mauj-e-tabassum na 'arusana libas

husn-e-masum ki pahchan haya aankhon ki

haal-e-dil lafzon ka muhtaj hai ye kis ne kaha

koi samjhe to ye aansu hain sada aankhon ki

hum ko le Dubega ye zahir-o-baatin ka tazad

ruh ka karb juda rah juda aankhon ki

gauhar-e-ashk ko arzan nahin karte ye log

qadr pahchante hain ahl-e-wafa aankhon ki

aankhon walon ne uDaya hai andheron ka mazaq

raushni chhin na le un se KHuda aankhon ki

is ko kya kahte hain 'iqbaal' main kis se puchhun

husn KHud dad-talab aur KHata aankhon ki