dil ki basti ko masarrat se sajae rakhiye

dil kī bastī ko masarrat se sajā.e rakhiye

yaar ke ġham ko muqaddar hī banā.e rakhiye

zauq-e-dīdār ko kuchh aur baḌhā.e rakhiye

chāñd se chehre ko chilman meñ chhupā.e rakhiye

kal bichhaḌ jaa.eñ to rah jā.eñgī yādeñ baaqī

aaj to saare hijābāt uThā.e rakhiye

ye vo daulat hai jo qismat se milā kartī hai

pyaar ke dard ko siine se lagā.e rakhiye

phir añdhere mirī rāhoñ meñ na aa jaa.eñ kahīñ

apnī ulfat se mire dil ko jalā.e rakhiye

chashm-e-duniyā ko kahāñ diid kā hāsil hai shu'ūr

rū-e-raushan ko hijāboñ meñ chhupā.e rakhiye

dil-e-'dānish' na hamesha ke liye ruk jaa.e

aap siine se zarā haath lagā.e rakhiye

dil ki basti ko masarrat se sajae rakhiye

yar ke gham ko muqaddar hi banae rakhiye

zauq-e-didar ko kuchh aur baDhae rakhiye

chand se chehre ko chilman mein chhupae rakhiye

kal bichhaD jaen to rah jaengi yaaden baqi

aaj to sare hijabaat uThae rakhiye

ye wo daulat hai jo qismat se mila karti hai

pyar ke dard ko sine se lagae rakhiye

phir andhere meri rahon mein na aa jaen kahin

apni ulfat se mere dil ko jalae rakhiye

chashm-e-duniya ko kahan did ka hasil hai shu'ur

ru-e-raushan ko hijabon mein chhupae rakhiye

dil-e-'danish' na hamesha ke liye ruk jae

aap sine se zara hath lagae rakhiye