dil ki bisat kya thi jo sarf-e-fughan raha

dil kī bisāt kyā thī jo sarf-e-fuġhāñ rahā

ghar meñ zarā sī aag kā kitnā dhuāñ rahā

shab bhar ḳhayāl-e-gesu-e-ambar-fishāñ rahā

mahkā huā shamīm se saarā makāñ rahā

kyā kyā na kāvishoñ pe mirī āsmāñ rahā

bijlī girā.ī mujh pe na jab āshiyāñ rahā

mahshar bhī koī dard hai jo uTh ke rah gayā

shikva bhī koī ġham hai jo dil meñ nihāñ rahā

ḳhurshīd āsmāñ pe rahā tū zamīñ pe hai

mīzān-e-husn meñ tirā palla girāñ rahā

jiine meñ kyā mazā jo nahīñ maut kā yaqīñ

marne meñ lutf kyā hai jo vo bad-gumāñ rahā

kasrat hijāb-e-dīda-e-ārif kabhī nahīñ

zarroñ meñ ek mehr kā jalva ayaañ rahā

bīmār-e-hijr maut se uTh kar lipaT gayā

vaade pe aayā jab koī terā gumāñ rahā

dil bhī gayā jigar bhī gayā jaan bhī ga.ī

maiñ phir bhī dekhtā hī tirī shoḳhiyāñ rahā

ai 'shola' kyā tabī.at-e-nāzuk pe zor duuñ

qadr-e-suḳhan rahī na koī qadr-dāñ rahā

dil ki bisat kya thi jo sarf-e-fughan raha

ghar mein zara si aag ka kitna dhuan raha

shab bhar KHayal-e-gesu-e-ambar-fishan raha

mahka hua shamim se sara makan raha

kya kya na kawishon pe meri aasman raha

bijli girai mujh pe na jab aashiyan raha

mahshar bhi koi dard hai jo uTh ke rah gaya

shikwa bhi koi gham hai jo dil mein nihan raha

KHurshid aasman pe raha tu zamin pe hai

mizan-e-husn mein tera palla giran raha

jine mein kya maza jo nahin maut ka yaqin

marne mein lutf kya hai jo wo bad-guman raha

kasrat hijab-e-dida-e-arif kabhi nahin

zarron mein ek mehr ka jalwa ayan raha

bimar-e-hijr maut se uTh kar lipaT gaya

wade pe aaya jab koi tera guman raha

dil bhi gaya jigar bhi gaya jaan bhi gai

main phir bhi dekhta hi teri shoKHiyan raha

ai 'shola' kya tabiat-e-nazuk pe zor dun

qadr-e-suKHan rahi na koi qadr-dan raha