dil ki chori mein jo chashm-e-surma-sa pakDi gai

dil kī chorī meñ jo chashm-e-surma-sā pakḌī ga.ī

vo thā chīn-e-zulf meñ ye be-ḳhatā pakḌī ga.ī

sub.h kū-e-yār meñ bād-e-sabā pakḌī ga.ī

ya.anī ġhībat meñ guloñ kī mubtalā pakḌī ga.ī

dil chaḌhā mushkil se tāq-e-abru-e-ḳhamdār par

sau jagah raste meñ jab zulf-e-rasā pakḌī ga.ī

jaan kar āñkheñ churā.īñ tū ne ham se bazm meñ

terī chorī dekh lī kyā bad-numā pakḌī ga.ī

hai isī meñ qalb-e-mahzūñ shartiya kahtā huuñ maiñ

khol muTThī terī chorī mah-laqā pakḌī ga.ī

mast ho kar us kī ḳhushbū se girā thā bach gayā

jab sambhalne ko vo zulf-e-mushk-sā pakḌī ga.ī

har taraf sehn-e-chaman meñ kahtī phirtī hai nasīm

gul se hañstī khilkhilātī motiyā pakḌī ga.ī

apne hāthoñ par liye phirte haiñ vo har dam halaf

aaḌ qasmoñ kī to mujh se bārhā pakḌī ga.ī

ruḳh se gul ko thā ta.alluq zulf se sumbul ko mel

ek jā gāñThā use ye ek jā pakḌī ga.ī

yaar hai ḳhanjar-ba-kaf aur jāñ-nisāroñ kā hujūm

haa.e ye kis jurm meñ ḳhalq-e-ḳhudā pakḌī ga.ī

aap hī kā aasrā hai aap kījegā madad

hashr meñ 'parvīñ' agar yā mustafā pakḌī ga.ī

dil ki chori mein jo chashm-e-surma-sa pakDi gai

wo tha chin-e-zulf mein ye be-KHata pakDi gai

subh ku-e-yar mein baad-e-saba pakDi gai

yani ghibat mein gulon ki mubtala pakDi gai

dil chaDha mushkil se taq-e-abru-e-KHamdar par

sau jagah raste mein jab zulf-e-rasa pakDi gai

jaan kar aankhen churain tu ne hum se bazm mein

teri chori dekh li kya bad-numa pakDi gai

hai isi mein qalb-e-mahzun shartiya kahta hun main

khol muTThi teri chori mah-laqa pakDi gai

mast ho kar us ki KHushbu se gira tha bach gaya

jab sambhalne ko wo zulf-e-mushk-sa pakDi gai

har taraf sehn-e-chaman mein kahti phirti hai nasim

gul se hansti khilkhilati motiya pakDi gai

apne hathon par liye phirte hain wo har dam halaf

aaD qasmon ki to mujh se barha pakDi gai

ruKH se gul ko tha talluq zulf se sumbul ko mel

ek ja ganTha use ye ek ja pakDi gai

yar hai KHanjar-ba-kaf aur jaan-nisaron ka hujum

hae ye kis jurm mein KHalq-e-KHuda pakDi gai

aap hi ka aasra hai aap kijega madad

hashr mein 'parwin' agar ya mustafa pakDi gai