دل کی چپ کے سمندر سے اٹھتا ہوا کیا عجب شور ہے

دل کی چپ کے سمندر سے اٹھتا ہوا کیا عجب شور ہے

کچھ سنائی نہیں دے رہا اس قدر زیر لب شور ہے

آسماں سے مسلسل ٹپکتی ہوئی چپ غضب چپ ہوئی

آسماں کی طرف اٹھنے والے دھوئیں کا غضب شور ہے

اپنے اپنے کنارے پہ ہم دونوں چپ چاپ بیٹھے ہوئے

بیچ میں اک زمانے سے بہتا ہوا بے سبب شور ہے

اس طرح شور یکجا ہوئے آسماں اور زمیں کے کہ اب

شاعری گیت نغمے سکوت و صدا سب کا سب شور ہے

کم نہیں ہے کسی طور شور قیامت سے یہ شور بھی

اے خدا دامن ہجر سے اٹھ رہا ہے جو اب شور ہے