dil ki chup ke samundar se uThta hua kya ajab shor hai

dil kī chup ke samundar se uThtā huā kyā 'ajab shor hai

kuchh sunā.ī nahīñ de rahā is qadar zer-e-lab shor hai

āsmāñ se musalsal Tapaktī huī chup ġhazab chup huī

āsmāñ kī taraf uThne vaale dhueñ kā ġhazab shor hai

apne apne kināre pe ham donoñ chup-chāp baiThe hue

biich meñ ik zamāne se bahtā huā be-sabab shor hai

is tarah shor yakjā hue āsmāñ aur zamīñ ke ki ab

shā'irī giit naġhme sukūt-o-sadā sab kā sab shor hai

kam nahīñ hai kisī taur shor-e-qayāmat se ye shor bhī

ai ḳhudā dāman-e-hijr se uTh rahā hai jo ab shor hai

dil ki chup ke samundar se uThta hua kya 'ajab shor hai

kuchh sunai nahin de raha is qadar zer-e-lab shor hai

aasman se musalsal Tapakti hui chup ghazab chup hui

aasman ki taraf uThne wale dhuen ka ghazab shor hai

apne apne kinare pe hum donon chup-chap baiThe hue

bich mein ek zamane se bahta hua be-sabab shor hai

is tarah shor yakja hue aasman aur zamin ke ki ab

sha'iri git naghme sukut-o-sada sab ka sab shor hai

kam nahin hai kisi taur shor-e-qayamat se ye shor bhi

ai KHuda daman-e-hijr se uTh raha hai jo ab shor hai