dil ki dhaDkan bhi sada dene lagi barsat ko

dil kī dhaḌkan bhī sadā dene lagī barsāt ko

yaad un kī aa ga.ī kamre meñ aadhī raat ko

har taraf pūrab ho pachchhim phuul se khilne lage

shīsha-o-sāġhar ne kal chūmā thā mere haat ko

dushmanoñ ke darmiyāñ jab naam terā aa gayā

bhar liyā dāman meñ jaise gardish-e-hālāt ko

maiñ samajhtā thā ki ab ye dūriyāñ miT jā.eñgī

Thes pahuñchātā rahā vo har ghaḌī jazbāt ko

tere jaane se har ik shai par udāsī chhā ga.ī

chhoḌ aaya gaañv meñ terī har ik sauġhāt ko

sochtā rahtā huuñ 'māhir' ā.inoñ ke darmiyāñ

kar gayā hai kaun raushan hijr-o-ġham kī raat ko

dil ki dhaDkan bhi sada dene lagi barsat ko

yaad un ki aa gai kamre mein aadhi raat ko

har taraf purab ho pachchhim phul se khilne lage

shisha-o-saghar ne kal chuma tha mere hat ko

dushmanon ke darmiyan jab nam tera aa gaya

bhar liya daman mein jaise gardish-e-haalat ko

main samajhta tha ki ab ye duriyan miT jaengi

Thes pahunchata raha wo har ghaDi jazbaat ko

tere jaane se har ek shai par udasi chha gai

chhoD aaya ganw mein teri har ek saughat ko

sochta rahta hun 'mahir' aainon ke darmiyan

kar gaya hai kaun raushan hijr-o-gham ki raat ko