دل کی دھڑکن کو حیات جاوداں سمجھا کئے

دل کی دھڑکن کو حیات جاوداں سمجھا کئے

چند لمحوں کو بہار بے کراں سمجھا کئے

ان کے جلوؤں کا یہ دھوکا تھا کہ ہم بھی عمر بھر

ایک اجڑے آشیاں کو گلستاں سمجھا کئے

یہ ہماری ایک لغزش تھی کہ راہ عشق میں

ہر نشان رہ کو سنگ آستاں سمجھا کئے

کس طرح اب ہم نبھائیں رسم‌ و آئین وفا

جب کسی نا مہرباں کو مہرباں سمجھا کئے

جانے کیا آنکھوں سے اشکوں نے کہا تھا رات بھر

نوک مژگاں مجھ کو اپنا رازداں سمجھا کئے

جب ہزاروں کو سنائی تھی حدیث درد و غم

ایک تم ہی تھے جو میری داستاں سمجھا کئے

ایسے بھی کچھ نام ہیں تاریخ کے صفحات پر

زندگی میں ہر نفس کو امتحاں سمجھا کئے

کس طرح دیتے انہیں حسن تغافل کا جواب

ایک مدت تک ہمیں جو بد گماں سمجھا کئے

یہ ہماری بد نصیبی تھی کہ اب تک اے شفقؔ

عشق میں بربادیوں کو رائیگاں سمجھا کئے