dil ki dhaDkan ko hayat-e-jawidan samjha kiye

dil kī dhaḌkan ko hayāt-e-jāvidāñ samjhā kiye

chand lamhoñ ko bahār-e-be-karāñ samjhā kiye

un ke jalvoñ kā ye dhokā thā ki ham bhī umr bhar

ek ujḌe āshiyāñ ko gulsitāñ samjhā kiye

ye hamārī ek laġhzish thī ki rāh-e-ishq meñ

har nishān-e-rah ko sang-e-āstāñ samjhā kiye

kis tarah ab ham nibhā.eñ rasm-o-ā.īn-e-vafā

jab kisī nā-mehrbāñ ko mehrbāñ samjhā kiye

jaane kyā āñkhoñ se ashkoñ ne kahā thā raat bhar

nok-e-mizhgāñ mujh ko apnā rāz-dāñ samjhā kiye

jab hazāroñ ko sunā.ī thī hadīs-e-dard-o-ġham

ek tum hī the jo merī dāstāñ samjhā kiye

aise bhī kuchh naam haiñ tārīḳh ke safhāt par

zindagī meñ har-nafas ko imtihāñ samjhā kiye

kis tarah dete unheñ husn-e-taġhāful kā javāb

ek muddat tak hameñ jo bad-gumāñ samjhā kiye

ye hamārī bad-nasībī thī ki ab tak ai 'shafaq'

ishq meñ barbādiyoñ ko rā.egāñ samjhā kiye

dil ki dhaDkan ko hayat-e-jawidan samjha kiye

chand lamhon ko bahaar-e-be-karan samjha kiye

un ke jalwon ka ye dhoka tha ki hum bhi umr bhar

ek ujDe aashiyan ko gulsitan samjha kiye

ye hamari ek laghzish thi ki rah-e-ishq mein

har nishan-e-rah ko sang-e-astan samjha kiye

kis tarah ab hum nibhaen rasm-o-ain-e-wafa

jab kisi na-mehrban ko mehrban samjha kiye

jaane kya aankhon se ashkon ne kaha tha raat bhar

nok-e-mizhgan mujh ko apna raaz-dan samjha kiye

jab hazaron ko sunai thi hadis-e-dard-o-gham

ek tum hi the jo meri dastan samjha kiye

aise bhi kuchh nam hain tariKH ke safhat par

zindagi mein har-nafas ko imtihan samjha kiye

kis tarah dete unhen husn-e-taghaful ka jawab

ek muddat tak hamein jo bad-guman samjha kiye

ye hamari bad-nasibi thi ki ab tak ai 'shafaq'

ishq mein barbaadiyon ko raegan samjha kiye