dil ki diwar mein aaina rakha tha kis ne

dil kī dīvār meñ ā.īna rakhā thā kis ne

mujh ko pahchānte rahne ko kahā thā kis ne

dushman-e-jāñ tire hāthoñ meñ to patthar bhī na thā

lazzat-e-ḳhvāb ko nam-dīda kiyā thā kis ne

ab bahut duur nikal jaane ko jī chāhtā hai

mujh ko jaate hue dīvāna kahā thā kis ne

us kī āñkhoñ meñ bulāvā hī na thā sach ye hai

ai shab-e-hijr tujhe saath kiyā thā kis ne

anjuman anjuman qisse the hamāre kal tak

aaj vīrānī ko āñkhoñ meñ rakhā thā kis ne

naam to us kā bhalā sā thā magar yaad nahīñ

siskiyāñ le ke tujhe yaad kiyā thā kis ne

dil ki diwar mein aaina rakha tha kis ne

mujh ko pahchante rahne ko kaha tha kis ne

dushman-e-jaan tere hathon mein to patthar bhi na tha

lazzat-e-KHwab ko nam-dida kiya tha kis ne

ab bahut dur nikal jaane ko ji chahta hai

mujh ko jate hue diwana kaha tha kis ne

us ki aankhon mein bulawa hi na tha sach ye hai

ai shab-e-hijr tujhe sath kiya tha kis ne

anjuman anjuman qisse the hamare kal tak

aaj virani ko aankhon mein rakha tha kis ne

nam to us ka bhala sa tha magar yaad nahin

siskiyan le ke tujhe yaad kiya tha kis ne