dil ki har baat man li humne

dil kī har baat maan lī ham ne

tujh ko paane kī Thaan lī ham ne

shahr kī vahshatoñ se ghabrā kar

chādar-e-dasht taan lī ham ne

ek duuje se chāhatoñ ke evaz

'umr bhar kī thakān lī ham ne

bech kar dushmanoñ ko saare tiir

ek ḳhālī kamān lī ham ne

shāyad ik roz is meñ dab jaa.eñ

ko.ele kī jo kaan lī ham ne

jab tamāshe ko garm honā thā

mohlat ik darmiyān lī ham ne

log jugnū pakaḌ na paa.e jab

uḌ ke ik kahkashān lī ham ne

āfateñ roz kar rahī haiñ salām

ġham kī goyā dukān lī ham ne

shab use bhūlne kī koshish kī

thak ke apnī hī jaan lī ham ne

ho ke 'ġhālib' se āshnā 'farhat'

phir nishāt-e-zabān lī ham ne

dil ki har baat man li hum ne

tujh ko pane ki Than li hum ne

shahr ki wahshaton se ghabra kar

chadar-e-dasht tan li hum ne

ek duje se chahaton ke ewaz

'umr bhar ki thakan li hum ne

bech kar dushmanon ko sare tir

ek KHali kaman li hum ne

shayad ek roz is mein dab jaen

koele ki jo kan li hum ne

jab tamashe ko garm hona tha

mohlat ek darmiyan li hum ne

log jugnu pakaD na pae jab

uD ke ek kahkashan li hum ne

aafaten roz kar rahi hain salam

gham ki goya dukan li hum ne

shab use bhulne ki koshish ki

thak ke apni hi jaan li hum ne

ho ke 'ghaalib' se aashna 'farhat'

phir nishat-e-zaban li hum ne