dil ki KHalwat se zaban tak ka safar kis ne kiya

dil kī ḳhalvat se zabāñ tak kā safar kis ne kiyā

dard ke aks-e-gurezāñ ko amar kis ne kiyā

muskurā kar zaḳhm khāne kī binā kis ne rakhī

talḳhiyoñ ko ziist se shīr-o-shakar kis ne kiyā

tum ne yā ham ne likhe paiġhām fasl-e-gul ke naam

ḳhushbuoñ ko gulsitāñ meñ nāma-bar kis ne kiyā

kyā ye is be-dast-o-pā andhe sadaf kā kaam hai

buuñd ko paanī kī zulmat meñ guhar kis ne kiyā

kis ne māh-e-nau kī Daalī paañv meñ beḌī mire

shaam ke manzar ko merā ham-safar kis ne kiyā

peḌ ko kis ne hilāyā hai ki uḌte haiñ parind

zehn meñ Thahre huoñ ko dar-ba-dar kis ne kiyā

zalzaloñ ne yā jabīñ ghiste hue sailāb ne

rafta-rafta ghar kī buniyādoñ meñ ghar kis ne kiyā

kis ne chhoḌā āsmāñ tak lā ke patthar kī tarah

maiñ parinda thā mujhe be-bāl-o-par kis ne kiyā

dil ki KHalwat se zaban tak ka safar kis ne kiya

dard ke aks-e-gurezan ko amar kis ne kiya

muskura kar zaKHm khane ki bina kis ne rakhi

talKHiyon ko zist se shir-o-shakar kis ne kiya

tum ne ya hum ne likhe paigham fasl-e-gul ke nam

KHushbuon ko gulsitan mein nama-bar kis ne kiya

kya ye is be-dast-o-pa andhe sadaf ka kaam hai

bund ko pani ki zulmat mein guhar kis ne kiya

kis ne mah-e-nau ki Dali panw mein beDi mere

sham ke manzar ko mera ham-safar kis ne kiya

peD ko kis ne hilaya hai ki uDte hain parind

zehn mein Thahre huon ko dar-ba-dar kis ne kiya

zalzalon ne ya jabin ghiste hue sailab ne

rafta-rafta ghar ki buniyaadon mein ghar kis ne kiya

kis ne chhoDa aasman tak la ke patthar ki tarah

main parinda tha mujhe be-baal-o-par kis ne kiya