dil ki kuduraten agar insan se dur hon

dil kī kudūrateñ agar insāñ se duur hoñ

saare nifāq gabr o musalmāñ se duur hoñ

nazdīk aa chukī hai savārī bahār kī

barg-e-ḳhizāñ-rasīda gulistāñ se duur hoñ

dil is qadar gudāz hai barsoñ hī ġham rahe

aañsū jo apne dīda-e-giryāñ se duur hoñ

miTtā nahīñ navishta-e-qismat kisī tarah

jauhar kabhī na ḳhanjar-e-burrāñ se duur hoñ

fasl-e-bahār aa.ī hai kapḌoñ ko phāḌiye

dil ke buḳhār dast-o-garebāñ se duur hoñ

chhiḌkāv kā irāda hai chashm-e-pur-āb kā

gard-o-ġhubār kūcha-e-jānāñ se duur hoñ

ye tañg kar rahā hai to uljhā rahe haiñ vo

dāman ke paaT pahle garebāñ se duur hoñ

vahsh o tuyūr ko mirī aa.heñ kareñ halāk

āb-o-giyāh koh-o-bayābāñ se duur hoñ

mumkin nahīñ najāt asīrān-e-ishq ko

ye qaidī vo nahīñ ki jo zindāñ se duur hoñ

muddat ke ba.ad aa.e haiñ sahrā meñ ai junūñ

do aable to ḳhār-e-muġhīlāñ se duur hoñ

gardish se chashm-e-yār ke 'ātish' ajab nahīñ

jo jo amal ki gardish-e-daurāñ se duur hoñ

dil ki kuduraten agar insan se dur hon

sare nifaq gabr o musalman se dur hon

nazdik aa chuki hai sawari bahaar ki

barg-e-KHizan-rasida gulistan se dur hon

dil is qadar gudaz hai barson hi gham rahe

aansu jo apne dida-e-giryan se dur hon

miTta nahin nawishta-e-qismat kisi tarah

jauhar kabhi na KHanjar-e-burran se dur hon

fasl-e-bahaar aai hai kapDon ko phaDiye

dil ke buKHar dast-o-gareban se dur hon

chhiDkaw ka irada hai chashm-e-pur-ab ka

gard-o-ghubar kucha-e-jaanan se dur hon

ye tang kar raha hai to uljha rahe hain wo

daman ke paT pahle gareban se dur hon

wahsh o tuyur ko meri aahen karen halak

aab-o-giyah koh-o-bayaban se dur hon

mumkin nahin najat asiran-e-ishq ko

ye qaidi wo nahin ki jo zindan se dur hon

muddat ke baad aae hain sahra mein ai junun

do aable to KHar-e-mughilan se dur hon

gardish se chashm-e-yar ke 'atish' ajab nahin

jo jo amal ki gardish-e-dauran se dur hon