dil ki kya qadr ho mehman kabhi aae na gae

dil kī kyā qadr ho mehmāñ kabhī aa.e na ga.e

is makāñ meñ tire paikāñ kabhī aa.e na ga.e

aap ishq-e-gul-o-bulbul kī ravish kyā jāneñ

andarūn-e-chamanistāñ kabhī aa.e na ga.e

ham ne ghar apnā hī vahshat meñ bayābāñ samjhā

bhuul kar sū-e-bayābāñ kabhī aa.e na ga.e

phir bhī karte haiñ bayāñ mulk-e-adam kā ahvāl

jiite jī hazrat-e-insāñ kabhī aa.e na ga.e

samjheñ vo kyā ki haiñ kis haal meñ āsūda-e-ḳhāk

jo sar-e-gor-e-ġharībāñ kabhī aa.e na ga.e

rakh liyā ishq meñ ashkoñ ne bharam rone kā

ye guhar tā sar-e-mizhgāñ kabhī aa.e na ga.e

qadr kyā ahl-e-zamāna ko hamārī ho 'rashīd'

ham kahīñ ban ke suḳhan-dāñ kabhī aa.e na ga.e

dil ki kya qadr ho mehman kabhi aae na gae

is makan mein tere paikan kabhi aae na gae

aap ishq-e-gul-o-bulbul ki rawish kya jaanen

andarun-e-chamanistan kabhi aae na gae

hum ne ghar apna hi wahshat mein bayaban samjha

bhul kar su-e-bayaban kabhi aae na gae

phir bhi karte hain bayan mulk-e-adam ka ahwal

jite ji hazrat-e-insan kabhi aae na gae

samjhen wo kya ki hain kis haal mein aasuda-e-KHak

jo sar-e-gor-e-ghariban kabhi aae na gae

rakh liya ishq mein ashkon ne bharam rone ka

ye guhar ta sar-e-mizhgan kabhi aae na gae

qadr kya ahl-e-zamana ko hamari ho 'rashid'

hum kahin ban ke suKHan-dan kabhi aae na gae