dil ki mere bisat kya ek diya bujha hua

dil kī mire bisāt kyā ek diyā bujhā huā

tum ne ise bajā kahā ek diyā bujhā huā

sar pe musallat kī ga.iiñ saare jahāñ kī zulmateñ

aur mujhe de diyā gayā ek diyā bujhā huā

ham ne to gul kiye the ḳhud apnī umiid ke charāġh

aap ne kyuuñ jalā diyā ek diyā bujhā huā

dil se na mere pūchhiye ālam-e-tark-e-ārzū

taaq meñ jis ke rah gayā ek diyā bujhā huā

ā.īna-e-vajūd meñ ḳhud ko jo dekhne gayā

merā hī 'aks ban gayā ek diyā bujhā huā

jab yake-bā'd-dīgre saare charāġh bujh ga.e

aap hī aap jal uThā ek diyā bujhā huā

aap kī kyā misāl duuñ aap to be-misāl haiñ

aur mirī misāl kyā ek diyā bujhā huā

maiñ ne to us ko baḳhsh dī qalb-o-nazar kī raushnī

us ne ḳhayāl ko diyā ek diyā bujhā huā

'ishq meñ ḳhaak ho ke bhī 'aḳhgar' ik aag sī rahī

mujh meñ ba-har-nafas jalā ek diyā bujhā huā

dil ki mere bisat kya ek diya bujha hua

tum ne ise baja kaha ek diya bujha hua

sar pe musallat ki gain sare jahan ki zulmaten

aur mujhe de diya gaya ek diya bujha hua

hum ne to gul kiye the KHud apni umid ke charagh

aap ne kyun jala diya ek diya bujha hua

dil se na mere puchhiye aalam-e-tark-e-arzu

taq mein jis ke rah gaya ek diya bujha hua

aaina-e-wajud mein KHud ko jo dekhne gaya

mera hi 'aks ban gaya ek diya bujha hua

jab yake-ba'd-digre sare charagh bujh gae

aap hi aap jal uTha ek diya bujha hua

aap ki kya misal dun aap to be-misal hain

aur meri misal kya ek diya bujha hua

main ne to us ko baKHsh di qalb-o-nazar ki raushni

us ne KHayal ko diya ek diya bujha hua

'ishq mein KHak ho ke bhi 'aKHgar' ek aag si rahi

mujh mein ba-har-nafas jala ek diya bujha hua