دل کی مرجھائی ہوئی شاخ کو پانی دے دے

دل کی مرجھائی ہوئی شاخ کو پانی دے دے

یاد رکھنے کے لئے کوئی نشانی دے دے

زخم سینے میں پرانے جو نکھر آئے ہیں

درد سہنے کی وہ عادت بھی پرانی دے دے

اس کو معلوم تو ہو جائے کہ الفت کیا ہے

اس کو پڑھنے کے لئے میری کہانی دے دے

دیکھ یوں پھر وہ جوانی کے حسیں دن یا رب

کچھ دنوں کے لئے احساس جوانی دے دے

جس ادا سے تو مرا گیت پڑھا کرتی ہے

اس ادا سے اسے آواز سہانی دے دے

کچھ نہیں چاہئے ساقیؔ کو خدا اس کے سوا

صبر کے ساتھ ہی بس شیری زبانی دے دے