dil ki rakhna dekh bhaal ai dil-bar-e-rangin-jamal

dil kī rakhnā dekh bhaal ai dil-bar-e-rañgīñ-jamāl

hai bahut nāzuk ye shīsha is meñ aa jaa.e na baal

ārzū-mandī meñ bhī mushkil-pasandī kā junūñ

dil usī ko chāhtā hai jis kā milnā hai muhāl

ik faqīr-e-be-navā ne mujh ko samjhāyā ye raaz

dard kī daulat ke aage hech haiñ maal o manāl

apnī kam-zarfī kā ġham hai aur koī ġham nahīñ

dil se terā ġham na sambhlā mujh ko hai bas ye malāl

itnī ḳhālī bhī nahīñ duniyā ḳhulūs-e-qalb se

aa hī jaate haiñ nazar ham aise muḳhlis ḳhaal ḳhaal

kirshn 'mohan' tab.a par taarī hai aisī be-hisī

ishq hai jī kā ziyāñ aur husn hai jaañ kā vabāl

dil ki rakhna dekh bhaal ai dil-bar-e-rangin-jamal

hai bahut nazuk ye shisha is mein aa jae na baal

aarzu-mandi mein bhi mushkil-pasandi ka junun

dil usi ko chahta hai jis ka milna hai muhaal

ek faqir-e-be-nawa ne mujh ko samjhaya ye raaz

dard ki daulat ke aage hech hain mal o manal

apni kam-zarfi ka gham hai aur koi gham nahin

dil se tera gham na sambhla mujh ko hai bas ye malal

itni KHali bhi nahin duniya KHulus-e-qalb se

aa hi jate hain nazar hum aise muKHlis KHal KHal

kirshn 'mohan' taba par tari hai aisi be-hisi

ishq hai ji ka ziyan aur husn hai jaan ka wabaal