dil ki shoala-zai ke aankhon ki tughyani ke din

dil kī sho.ala-zā.ī ke āñkhoñ kī tuġhyānī ke din

haiñ javānī ke hī din dar-asl jaulānī ke din

in meñ to dānā.iyāñ khul kar dikhātī haiñ kamāl

kaun kahtā hai ki ye hote haiñ nādānī ke din

thā lahū meñ tar-ba-tar dāman hamārā jin dinoñ

ham na bhūleñge kabhī vo ḳhūn-afshānī ke din

taaza taaza aayā thā jab kārvān-e-fasl-e-gul

yaad haiñ ab tak hameñ vo ḳhāna-vīrānī ke din

kaise logoñ ko batā.eñ mushkiloñ par mushkileñ

kitnī paidā karte haiñ ye ḳhvāb-sāmānī ke din

hote hote jaan ko ho jaatā hai hāsil qarār

jaate jaate jaate haiñ 'manshā' pareshānī ke din

dil ki shoala-zai ke aankhon ki tughyani ke din

hain jawani ke hi din dar-asl jaulani ke din

in mein to danaiyan khul kar dikhati hain kamal

kaun kahta hai ki ye hote hain nadani ke din

tha lahu mein tar-ba-tar daman hamara jin dinon

hum na bhulenge kabhi wo KHun-afshani ke din

taza taza aaya tha jab karwan-e-fasl-e-gul

yaad hain ab tak hamein wo KHana-virani ke din

kaise logon ko bataen mushkilon par mushkilen

kitni paida karte hain ye KHwab-samani ke din

hote hote jaan ko ho jata hai hasil qarar

jate jate jate hain 'mansha' pareshani ke din