dil ki taraf kuchh aah se dil ka lagao hai

dil kī taraf kuchh aah se dil kā lagāo hai

Tak aap bhī to aa.iye yaañ zor baav hai

uThtā nahīñ hai haath tirā teġh-e-jaur se

nāhaq kushī kahāñ ta.iiñ ye kyā subhāv hai

bāġh-e-nazar hai chashm ke manzar kā sab jahāñ

Tak Thahro yaañ to jaano ki kaisā dikhāo hai

taqrīb ham ne Daalī hai us se juue kī ab

jo ban paḌe hai Tak to hamārā hī daav hai

Tapkā kare hai aañkh se lohū hī roz-o-shab

chehre pe mere chashm hai yā koī ghaav hai

zabt sarishk-e-ḳhūnīñ se jī kyūñke shaad ho

ab dil kī taraf lohū kā saarā bahāo hai

ab sab ke rozgār kī sūrat bigaḌ ga.ī

lākhoñ meñ ek do kā kahīñ kuchh banāo hai

chhātī ke merī saare numūdār haiñ ye zaḳhm

parda rahā hai kaun sā ab kyā chhupāo hai

āshiq kaheñ jo hoge to jānoge qadr-e-'mīr'

ab to kisī ke chāhne kā tum ko chaav hai

dil ki taraf kuchh aah se dil ka lagao hai

Tak aap bhi to aaiye yan zor baw hai

uThta nahin hai hath tera tegh-e-jaur se

nahaq kushi kahan tain ye kya subhaw hai

bagh-e-nazar hai chashm ke manzar ka sab jahan

Tak Thahro yan to jaano ki kaisa dikhao hai

taqrib hum ne Dali hai us se jue ki ab

jo ban paDe hai Tak to hamara hi daw hai

Tapka kare hai aankh se lohu hi roz-o-shab

chehre pe mere chashm hai ya koi ghaw hai

zabt sarishk-e-KHunin se ji kyunke shad ho

ab dil ki taraf lohu ka sara bahao hai

ab sab ke rozgar ki surat bigaD gai

lakhon mein ek do ka kahin kuchh banao hai

chhati ke meri sare numudar hain ye zaKHm

parda raha hai kaun sa ab kya chhupao hai

aashiq kahen jo hoge to jaanoge qadr-e-'mir'

ab to kisi ke chahne ka tum ko chaw hai