dil ki taraf nigah-e-taghaful raha kare

dil kī taraf nigāh-e-taġhāful rahā kare

is ḳhāk-e-rāh ko bhī koī kīmiyā kare

hiire kī kaan dekh ke aatā hai ye ḳhayāl

kaash is zamīñ se dāna-e-gandum ugā kare

TuuTe kisī tarah to dhueñ kā siyah tilism

har shaam is dayār meñ āñdhī chalā kare

dhīme dukhoñ kī raakh badan par milī to hai

vo Daal de nazar to mujhe aa.inā kare

ḳhushbū mire ġhamoñ kī bikhar jaa.e duur duur

yuuñ chup rahūñ ki ek zamāna sunā kare

bujhne lagī hai shaam ke āñgan meñ raushnī

ab mauj-e-ḳhūn-e-dil hī koī mo.ajiza kare

dil ki taraf nigah-e-taghaful raha kare

is KHak-e-rah ko bhi koi kimiya kare

hire ki kan dekh ke aata hai ye KHayal

kash is zamin se dana-e-gandum uga kare

TuTe kisi tarah to dhuen ka siyah tilism

har sham is dayar mein aandhi chala kare

dhime dukhon ki rakh badan par mili to hai

wo Dal de nazar to mujhe aaina kare

KHushbu mere ghamon ki bikhar jae dur dur

yun chup rahun ki ek zamana suna kare

bujhne lagi hai sham ke aangan mein raushni

ab mauj-e-KHun-e-dil hi koi moajiza kare