dil ki tauhin na kar dard sunane wale

dil kī tauhīn na kar dard sunāne vaale

is zamāne meñ ziyāda haiñ zamāne vaale

is galī se bhī kabhī khol ke zulfoñ ko guzar

sar pe rakkhe hue ḳhushbū ke ḳhazāne vaale

aañkh tā۔bīr kī dahlīz pe rakkhī huī hai

ḳhvāb bhī dekhe haiñ nīñdoñ ko uḌāne vaale

rāhat-e-jāñ hai tirī saañs kī ḳhushbū jānāñ

phūñk mantar ye mujhe hosh meñ laane vaale

andhī āñkhoñ pe tū mat bāñdh havas kī paTTī

toḌ kar ḳhvāb na.e ḳhvāb dikhāne vaale

tū mirā thā to tirā naam sahārā bhī thā

chhoḌ kar mujh ko vajūd apnā gañvāne vaale

vaqt jiddat ke ta.āqub meñ kahāñ le aaya

diin sikhlā.enge ab nāchne gaane vaale

bin tire saañs kā ehsān jatātā huā jism

chhoḌne vaalā huuñ ai chhoḌ ke jaane vaale

aaj bhī mere laḌakpan ko tū dekhe 'shāhid'

kaash lauT aa.eñ mire dost purāne vaale

dil ki tauhin na kar dard sunane wale

is zamane mein ziyaada hain zamane wale

is gali se bhi kabhi khol ke zulfon ko guzar

sar pe rakkhe hue KHushbu ke KHazane wale

aankh ta۔bir ki dahliz pe rakkhi hui hai

KHwab bhi dekhe hain nindon ko uDane wale

rahat-e-jaan hai teri sans ki KHushbu jaanan

phunk mantar ye mujhe hosh mein lane wale

andhi aankhon pe tu mat bandh hawas ki paTTi

toD kar KHwab nae KHwab dikhane wale

tu mera tha to tera nam sahaara bhi tha

chhoD kar mujh ko wajud apna ganwane wale

waqt jiddat ke taaqub mein kahan le aaya

din sikhlaenge ab nachne gane wale

bin tere sans ka ehsan jatata hua jism

chhoDne wala hun ai chhoD ke jaane wale

aaj bhi mere laDakpan ko tu dekhe 'shahid'

kash lauT aaen mere dost purane wale