dil kisi samt kisi samt qadam jata hai

dil kisī samt kisī samt qadam jaatā hai

tere maujūd ke chakkar meñ adam jaatā hai

aur to kuchh nahīñ hotā tire milne se magar

ek tūfān-e-ta'alluq hai jo tham jaatā hai

mujh ko sāvan meñ kabhī ḳhat na ravāna karnā

jaate jaate tire maktūb se nam jaatā hai

is liye bolā use ḳhud se pare jaane kā

jis taraf ham use kahte haiñ vo kam jaatā hai

raqs-e-doshīza-e-duniyā pe nazar paḌte hī

jām-e-jamshed mire haath meñ jam jaatā hai

kisī dil se kisī pahlū se kisī duniyā se

aadmī jaatā hai kab ranj-o-alam jaatā hai

naġhma-e-tūl-e-shab-e-hijr mire bas kā nahīñ

maiñ agar lai ko pakaḌtā huuñ to sam jaatā hai

haath uThā luuñ to tirī ḳhushbū chalī jā.egī

sar jhaTak duuñ to tirā dast-e-sitam jaatā hai

ba.az auqāt havāoñ ke ta.āqub ke liye

maiñ na jā.ūñ to mirā naqsh-e-qadam jaatā hai

dil kisi samt kisi samt qadam jata hai

tere maujud ke chakkar mein adam jata hai

aur to kuchh nahin hota tere milne se magar

ek tufan-e-ta'alluq hai jo tham jata hai

mujh ko sawan mein kabhi KHat na rawana karna

jate jate tere maktub se nam jata hai

is liye bola use KHud se pare jaane ka

jis taraf hum use kahte hain wo kam jata hai

raqs-e-doshiza-e-duniya pe nazar paDte hi

jam-e-jamshed mere hath mein jam jata hai

kisi dil se kisi pahlu se kisi duniya se

aadmi jata hai kab ranj-o-alam jata hai

naghma-e-tul-e-shab-e-hijr mere bas ka nahin

main agar lai ko pakaDta hun to sam jata hai

hath uTha lun to teri KHushbu chali jaegi

sar jhaTak dun to tera dast-e-sitam jata hai

baz auqat hawaon ke taaqub ke liye

main na jaun to mera naqsh-e-qadam jata hai