dil kitna aabaad hua jab did ke ghar barbaad hue

dil kitnā ābād huā jab diid ke ghar barbād hue

vo bichhḌā aur dhyān meñ us ke sau mausam ījād hue

nāmvarī kī baat digar hai varna yaaro socho to

gulgūñ ab tak kitne teshe be-ḳhūn-e-farhād hue

lā.eñge kahāñ se bol rasīle hoñToñ kī nādārī meñ

samjho ek zamāna guzrā bosoñ kī imdād hue

tum merī ik ḳhud-mastī ho maiñ huuñ tumhārī ḳhud-bīnī

rishte meñ ik ishq ke ham tum donoñ be-buniyād hue

merā kyā ik mauj-e-havā huuñ par yuuñ hai ai ġhuncha-dahan

tū ne dil kā baaġh jo chhoḌā ġhunche be-ustād hue

ishq-mohalle meñ ab yaaro kyā koī ma.ashūq nahīñ

kitne qātil mausam guzre shor hue fariyād hue

ham ne dil ko maar rakhā hai aur jatāte phirte haiñ

ham dil zaḳhmī mizhgāñ ḳhūnīñ ham na hue jallād hue

barq kiyā hai aks-e-badan ne tere hameñ ik tañg qabā

tere badan par jitne til haiñ saare ham ko yaad hue

tū ne kabhī sochā to hogā sochā bhī ai mast-adā

terī adā kī ābādī par kitne ghar barbād hue

jo kuchh bhī rūdād-e-suḳhan thī hoñToñ kī duurī se thī

jab hoñToñ se hoñT mile to yak-dam be-rūdād hue

ḳhāk-nashīnoñ se kūche ke kyā kyā naḳhvat karte haiñ

jānāñ jaan tire darbāñ to fir.aun-o-shaddād hue

shahroñ meñ hī ḳhaak uḌā lo shor machā lo be-jā lo

jin dashtoñ kī soch rahe ho vo kab ke barbād hue

samtoñ meñ bikhrī vo ḳhalvat vo dil kī rañg-e-ābādī

ya.anī vo jo bām-o-dar the yaksar gard-o-bād hue

tū ne rindoñ kā haq maarā mai-ḳhāne meñ raat ga.e

shaiḳh khare sayyad haiñ ham to ham ne sunāyā shaad hue

dil kitna aabaad hua jab did ke ghar barbaad hue

wo bichhDa aur dhyan mein us ke sau mausam ijad hue

namwari ki baat digar hai warna yaro socho to

gulgun ab tak kitne teshe be-KHun-e-farhad hue

laenge kahan se bol rasile honTon ki nadari mein

samjho ek zamana guzra boson ki imdad hue

tum meri ek KHud-masti ho main hun tumhaari KHud-bini

rishte mein ek ishq ke hum tum donon be-buniyaad hue

mera kya ek mauj-e-hawa hun par yun hai ai ghuncha-dahan

tu ne dil ka bagh jo chhoDa ghunche be-ustad hue

ishq-mohalle mein ab yaro kya koi mashuq nahin

kitne qatil mausam guzre shor hue fariyaad hue

hum ne dil ko mar rakha hai aur jatate phirte hain

hum dil zaKHmi mizhgan KHunin hum na hue jallad hue

barq kiya hai aks-e-badan ne tere hamein ek tang qaba

tere badan par jitne til hain sare hum ko yaad hue

tu ne kabhi socha to hoga socha bhi ai mast-ada

teri ada ki aabaadi par kitne ghar barbaad hue

jo kuchh bhi rudad-e-suKHan thi honTon ki duri se thi

jab honTon se honT mile to yak-dam be-rudad hue

KHak-nashinon se kuche ke kya kya naKHwat karte hain

jaanan jaan tere darban to firaun-o-shaddad hue

shahron mein hi KHak uDa lo shor macha lo be-ja lo

jin dashton ki soch rahe ho wo kab ke barbaad hue

samton mein bikhri wo KHalwat wo dil ki rang-e-abaadi

yani wo jo baam-o-dar the yaksar gard-o-baad hue

tu ne rindon ka haq mara mai-KHane mein raat gae

shaiKH khare sayyad hain hum to hum ne sunaya shad hue