دل کو دنیا داری کا آسرا نہیں معلوم

دل کو دنیا داری کا آسرا نہیں معلوم

کس طرف کو جانا ہے راستہ نہیں معلوم

ہم نے جان و دل دے کر عاشقی کے رستے پر

ابتدا تو کر دی ہے انتہا نہیں معلوم

اپنی اپنی وحدت میں اس جنوں کی حالت میں

کب تلک رہیں گے ہم مبتلا نہیں معلوم

میں تو چلتا جاتا ہوں جس طرف ہوا جائے

مجھ کو اپنی ہی منزل با خدا نہیں معلوم

کس کو کیسے چوٹ آئی کس کا کیسے دل ٹوٹا

کس کو کیسا پیش آیا حادثہ نہیں معلوم

ریزہ ریزہ دل ہے پر اب تلک کھڑا ہوں میں

جانے کب بکھر جائے حوصلہ نہیں معلوم

اک طرف زمیں ہوں میں اک طرف گگن ہو تم

درمیاں کہانی کا ماجرا نہیں معلوم

آئنے کے پردے پر عکس اپنا دکھتا ہے

کون اس میں کھلتا ہے گل نما نہیں معلوم

ساحلوں نے جب چومی میری آبلہ پائی

دل کو یوں لگا جیسے نقش پا نہیں معلوم