dil ko humne mail-e-ah-o-fughan rahne diya

dil ko ham ne mā.il-e-āh-o-fuġhāñ rahne diyā

zindagī ko vaqf-e-ālām-e-jahāñ rahne diyā

muft meñ rusvā ho kyoñ ḳhuddārī-e-ahl-e-junūñ

maiñ ne dil kī baat ko dil meñ nihāñ rahne diyā

harf kyoñ aa.e bhalā ka.aba-sifat dil par mire

go butoñ ko maiñ ne dil ke darmiyāñ rahne diyā

har-nafas taaza ḳhalish hai har qadam taaza sitam

gardish-e-ayyām ne kab shādmāñ rahne diyā

ham ne nāmūs-e-gulistāñ ke tahaffuz ke liye

bijliyoñ kī zad pe apnā āshiyāñ rahne diyā

le uḌī hotī havā-e-gumrahī rasm-e-vajūd

vo to ham ne sar ko zeb-e-āstāñ rahne diyā

uf mirī ḳhalvat-talab kaifiyyat-e-dīvāngī

hasb-e-armāñ terī mahfil meñ kahāñ rahne diyā

ye samajh kar us meñ shāmil hai ḳhushī terī ai dost

zindagī ko tere ġham meñ nauha-ḳhvāñ rahne diyā

un kī yād-e-jāñ-fazā aa.ī kuchh is andāz se

naam is kā der tak vird-e-zabāñ rahne diyā

kar ke chashm-e-nāz ne shādāb zaḳhmoñ ke gulāb

gulshan-e-dil meñ bahāroñ ko javāñ rahne diyā

ham hujūm-e-ġham meñ 'nāsir' muskurāte hī rahe

zindagī se maut ko yuuñ bad-gumāñ rahne dayā

dil ko hum ne mail-e-ah-o-fughan rahne diya

zindagi ko waqf-e-alam-e-jahan rahne diya

muft mein ruswa ho kyon KHuddari-e-ahl-e-junun

main ne dil ki baat ko dil mein nihan rahne diya

harf kyon aae bhala kaba-sifat dil par mere

go buton ko main ne dil ke darmiyan rahne diya

har-nafas taza KHalish hai har qadam taza sitam

gardish-e-ayyam ne kab shadman rahne diya

hum ne namus-e-gulistan ke tahaffuz ke liye

bijliyon ki zad pe apna aashiyan rahne diya

le uDi hoti hawa-e-gumrahi rasm-e-wajud

wo to hum ne sar ko zeb-e-astan rahne diya

uf meri KHalwat-talab kaifiyyat-e-diwangi

hasb-e-arman teri mahfil mein kahan rahne diya

ye samajh kar us mein shamil hai KHushi teri ai dost

zindagi ko tere gham mein nauha-KHwan rahne diya

un ki yaad-e-jaan-faza aai kuchh is andaz se

nam is ka der tak wird-e-zaban rahne diya

kar ke chashm-e-naz ne shadab zaKHmon ke gulab

gulshan-e-dil mein bahaaron ko jawan rahne diya

hum hujum-e-gham mein 'nasir' muskuraate hi rahe

zindagi se maut ko yun bad-guman rahne daya