dil ko isi sabab se hai iztirab shayad

dil ko isī sabab se hai iztirāb shāyad

qāsid phirā hai le kar ḳhat kā javāb shāyad

āñkheñ chaḌhī huī haiñ bāteñ haiñ bahkī bahkī

aa.e ho tum kahīñ se pī kar sharāb shāyad

kyā jaane kis havā meñ itnā ubhar rahā hai

hastī nahīñ samajhtā apnī habāb shāyad

mujh par jo vo sahar se is darja mehrbāñ haiñ

shab kī duā huī hai kuchh mustajāb shāyad

bīmār huuñ bañdhī hai dhun rāt-din safar kī

ġhurbat meñ apnī miTTī hogī ḳharāb shāyad

pichhle se vasl kī shab āsār sub.h ke haiñ

niklegā raat hī se aaj āftāb shāyad

aayā bahut dinoñ par zāhid jo mai-kade meñ

bhūlī huī thī us ko rāh-e-savāb shāyad

barsāt kī kamī se kyā qadr ghaT ga.ī hai

aisī kabhī bikī ho arzāñ sharāb shāyad

apne dimāġh meñ to ab ye basī huī hai

behtar tire pasīne se ho gulāb shāyad

bazm-e-adū meñ aa kar jis tarah ham jale haiñ

dozaḳh meñ ho kisī par aisā azaab shāyad

ashkoñ se tar huī thī yuuñ raat sej un kī

yaad aa gayā thā koī hañgām-e-ḳhvāb shāyad

ai shaiḳh tū milā kar dekh un se umr apnī

hūroñ kā Dhal gayā ho ab to shabāb shāyad

tauba 'hafīz' mai kā paḌ jaa.e jis ko chaskā

phir us se marte dam tak chhūTe sharāb shāyad

dil ko isi sabab se hai iztirab shayad

qasid phira hai le kar KHat ka jawab shayad

aankhen chaDhi hui hain baaten hain bahki bahki

aae ho tum kahin se pi kar sharab shayad

kya jaane kis hawa mein itna ubhar raha hai

hasti nahin samajhta apni habab shayad

mujh par jo wo sahar se is darja mehrban hain

shab ki dua hui hai kuchh mustajab shayad

bimar hun bandhi hai dhun raat-din safar ki

ghurbat mein apni miTTi hogi KHarab shayad

pichhle se wasl ki shab aasar subh ke hain

niklega raat hi se aaj aaftab shayad

aaya bahut dinon par zahid jo mai-kade mein

bhuli hui thi us ko rah-e-sawab shayad

barsat ki kami se kya qadr ghaT gai hai

aisi kabhi biki ho arzan sharab shayad

apne dimagh mein to ab ye basi hui hai

behtar tere pasine se ho gulab shayad

bazm-e-adu mein aa kar jis tarah hum jale hain

dozaKH mein ho kisi par aisa azab shayad

ashkon se tar hui thi yun raat sej un ki

yaad aa gaya tha koi hangam-e-KHwab shayad

ai shaiKH tu mila kar dekh un se umr apni

huron ka Dhal gaya ho ab to shabab shayad

tauba 'hafiz' mai ka paD jae jis ko chaska

phir us se marte dam tak chhuTe sharab shayad