dil ko kis surat se kije chashm-e-dilbar se juda

dil ko kis sūrat se kiije chashm-e-dilbar se judā

shīsha-e-mai ko nahīñ rakhte haiñ sāġhar se judā

maiñ to huuñ ai tāla-e-bargashta dilbar se judā

aur patthar āsiyā kā ho na patthar se judā

us ke bahr-e-husn meñ mat chhoḌ ai dil tār-e-zulf

ġharq ho jaatī hai kashtī ho ke lañgar se judā

ishq meñ shīrīñ ke tū ne jān-e-shīrīñ dī hai aah

naqsh terā kohkan ho kyuuñ ki patthar se judā

chashm ye tujh se hai yā-rab tā na ho lail-o-nahār

chashm us parda-nashīñ ke raḳhna-e-dar se judā

kanda is mere nagīn-e-dil pe terā naam hai

us ko apne ḳhātam-e-dil ke na kar ghar se judā

is ko kahte haiñ mohabbat shīsha-e-sā.at ko dekh

ek ke hotā nahīñ hai dūsrā bar se judā

vo udhar ḳhandāñ hai maiñ giryāñ idhar hairat hai ye

barq chamke abr garje aur meñh barse judā

sūrat-e-bādām-e-tav-am roz-o-shab hotā nahīñ

chashm-e-dilbar kā tasavvur chashm ke ghar se judā

sozan-e-be-rishta aatī hai kasī ko kab nazar

to na ho ai āh-e-dil is jism-e-lāġhar se judā

parda-e-mīnā se saaqī duḳht-e-raz nikle hai kyuuñ

āftāb-e-ḳhāvarī hotā hai ḳhāvar se judā

us kī mizhgāñ se chhuḌā.ūñ dil ko kis sūrat se maiñ

panjā-e-shāhīñ nahīñ hotā kabūtar se judā

taab us champā-kalī kī yuuñ hai tikme ke tale

juuñ kiran chamke hai ho kar mahr-e-anvar se judā

ashk-e-chashm-e-tar ko rahne duuñ tah-e-mizhgāñ na kyuuñ

tifl ko karte nahīñ dāmān-e-māder se judā

is zamīñ meñ likh ġhazal ik aur pur-ma.anī 'nasīr'

rañg ya.anī ho nahīñ saktā gul-e-tar se judā

is ġhazal ko sun ke 'ḳhāqānī' kare vajd ai 'nasīr'

'anvarī' bhī sar ko apne paTke patthar se judā

dil ko kis surat se kije chashm-e-dilbar se juda

shisha-e-mai ko nahin rakhte hain saghar se juda

main to hun ai tala-e-bargashta dilbar se juda

aur patthar aasiya ka ho na patthar se juda

us ke bahr-e-husn mein mat chhoD ai dil tar-e-zulf

gharq ho jati hai kashti ho ke langar se juda

ishq mein shirin ke tu ne jaan-e-shirin di hai aah

naqsh tera kohkan ho kyun ki patthar se juda

chashm ye tujh se hai ya-rab ta na ho lail-o-nahaar

chashm us parda-nashin ke raKHna-e-dar se juda

kanda is mere nagin-e-dil pe tera nam hai

us ko apne KHatam-e-dil ke na kar ghar se juda

is ko kahte hain mohabbat shisha-e-saat ko dekh

ek ke hota nahin hai dusra bar se juda

wo udhar KHandan hai main giryan idhar hairat hai ye

barq chamke abr garje aur meinh barse juda

surat-e-baadam-e-taw-am roz-o-shab hota nahin

chashm-e-dilbar ka tasawwur chashm ke ghar se juda

sozan-e-be-rishta aati hai kasi ko kab nazar

to na ho ai aah-e-dil is jism-e-laghar se juda

parda-e-mina se saqi duKHt-e-raz nikle hai kyun

aaftab-e-KHawari hota hai KHawar se juda

us ki mizhgan se chhuDaun dil ko kis surat se main

panja-e-shahin nahin hota kabutar se juda

tab us champa-kali ki yun hai tikme ke tale

jun kiran chamke hai ho kar mahr-e-anwar se juda

ashk-e-chashm-e-tar ko rahne dun tah-e-mizhgan na kyun

tifl ko karte nahin daman-e-mader se juda

is zamin mein likh ghazal ek aur pur-mani 'nasir'

rang yani ho nahin sakta gul-e-tar se juda

is ghazal ko sun ke 'KHaqani' kare wajd ai 'nasir'

'anwari' bhi sar ko apne paTke patthar se juda