dil ko le kar humse ab jaan bhi talab karte hain aap

dil ko le kar ham se ab jaañ bhī talab karte haiñ aap

lījiye hāzir hai par ye to ġhazab karte haiñ aap

morid-e-taqsīr gar hote to lāzim thī sazā

ye jafā phir kahiye ham par kis sabab karte haiñ aap

karte ho abrū se kushta ruḳh se dete ho jilā

husn meñ e.ajāz kyā kyā roz-o-shab karte haiñ aap

qais se jo thā kiyā dar-parda lailā ne sulūk

so vahī ai mehrbāñ ham se bhī ab karte haiñ aap

be-kalī hotī hai hasrat se dil-e-sad-chāk ko

apnī zulf-e-ambarīñ ko shāna jab karte haiñ aap

ham ne pūchhā phir bhī us kī jaañ phirī sab jism meñ

naza.a meñ duurī se jis ko jāñ-ba-lab karte haiñ aap

hañs ke farmāyā 'nazīr' apnī duā-e-lutf se

ye bhī ho saktā hai kyā is kā ojab karte haiñ aap

dil ko le kar hum se ab jaan bhi talab karte hain aap

lijiye hazir hai par ye to ghazab karte hain aap

morid-e-taqsir gar hote to lazim thi saza

ye jafa phir kahiye hum par kis sabab karte hain aap

karte ho abru se kushta ruKH se dete ho jila

husn mein eajaz kya kya roz-o-shab karte hain aap

qais se jo tha kiya dar-parda laila ne suluk

so wahi ai mehrban hum se bhi ab karte hain aap

be-kali hoti hai hasrat se dil-e-sad-chaak ko

apni zulf-e-ambarin ko shana jab karte hain aap

hum ne puchha phir bhi us ki jaan phiri sab jism mein

naza mein duri se jis ko jaan-ba-lab karte hain aap

hans ke farmaya 'nazir' apni dua-e-lutf se

ye bhi ho sakta hai kya is ka ojab karte hain aap