dil ko mamur karo jazb-o-asar se pahle

dil ko ma.amūr karo jazb-o-asar se pahle

naqsh-e-manzil chamak uTTheñge safar se pahle

lamha-e-fikr se saaqī kī muravvat ke liye

bazm-e-rindāñ meñ chale jaam kidhar se pahle

garmi-e-ishq ne baḳhshā hai ye aalam varna

husn bedār na thā merī nazar se pahle

rif.ateñ kaun-o-makāñ kī bhī simaT aatī haiñ

kis ko ma.alūm thā ye sajda-e-dar se pahle

dāman-e-mizhgāñ ke shab-tāb sitāroñ kī qasam

ik hasīñ sub.h kā aalam thā sahar se pahle

lab bhī betāb haiñ iz.hār-e-haqīqat ke liye

dāstāñ sun lo magar dīda-e-tar se pahle

kahkashāñ-sāz kiyā qadmoñ ko maiñ ne varna

kaun vāqif thā tirī rāhguzar se pahle

lazzat dard farishtoñ ko 'razā' kyā ma.alūm

na huā ishq kā āzār bashar se pahle

dil ko mamur karo jazb-o-asar se pahle

naqsh-e-manzil chamak uTThenge safar se pahle

lamha-e-fikr se saqi ki murawwat ke liye

bazm-e-rindan mein chale jam kidhar se pahle

garmi-e-ishq ne baKHsha hai ye aalam warna

husn bedar na tha meri nazar se pahle

rifaten kaun-o-makan ki bhi simaT aati hain

kis ko malum tha ye sajda-e-dar se pahle

daman-e-mizhgan ke shab-tab sitaron ki qasam

ek hasin subh ka aalam tha sahar se pahle

lab bhi betab hain izhaar-e-haqiqat ke liye

dastan sun lo magar dida-e-tar se pahle

kahkashan-saz kiya qadmon ko main ne warna

kaun waqif tha teri rahguzar se pahle

lazzat dard farishton ko 'raza' kya malum

na hua ishq ka aazar bashar se pahle