dil ko rahin-e-lazzat-e-darman na kar sake

dil ko rahīn-e-lazzat-e-darmāñ na kar sake

ham un se bhī shikāyat-e-hijrāñ na kar sake

is tarah phūñk merā gulistān-e-ārzū

phir koī tere ba.ad ise vīrāñ na kar sake

mahñgī thī is qadar tire jalvoñ kī raushnī

ham apnī ek shaam firozāñ na kar sake

bichhḌe rahe to aur bhī rusvā kareñge log

tum bhī ilāj-e-gardish-e-daurāñ na kar sake

dil un ke haath se bhī gayā ham se bhī gayā

shāyad vo pās-e-ḳhātir-e-mehmāñ na kar sake

un par bhī āshkār ho kyuuñ apne dil kā haal

ham is matā-e-dard ko arzāñ na kar sake

'āzam' hazār baar luTe rāh-e-ishq meñ

lekin kabhī shikāyat-e-daurāñ na kar sake

dil ko rahin-e-lazzat-e-darman na kar sake

hum un se bhi shikayat-e-hijran na kar sake

is tarah phunk mera gulistan-e-arzu

phir koi tere baad ise viran na kar sake

mahngi thi is qadar tere jalwon ki raushni

hum apni ek sham firozan na kar sake

bichhDe rahe to aur bhi ruswa karenge log

tum bhi ilaj-e-gardish-e-dauran na kar sake

dil un ke hath se bhi gaya hum se bhi gaya

shayad wo pas-e-KHatir-e-mehman na kar sake

un par bhi aashkar ho kyun apne dil ka haal

hum is mata-e-dard ko arzan na kar sake

'azam' hazar bar luTe rah-e-ishq mein

lekin kabhi shikayat-e-dauran na kar sake