dil ko taufiq-e-ziyan ho to ghazal hoti hai

dil ko taufīq-e-ziyāñ ho to ġhazal hotī hai

zahr-e-ġham bāda-chukāñ ho to ġhazal hotī hai

fikr tap tap ke nikhartī rahe kundan kī tarah

aag siine kī javāñ ho to ġhazal hotī hai

dhīmī dhīmī sī navā silsila junbān-e-abad

parda-e-jāñ meñ nihāñ ho to ġhazal hotī hai

dhaḌkaneñ sūrat-e-alfāz bikhartī jaa.eñ

dil ma'ānī kī zabāñ ho to ġhazal hotī hai

aañch miTTī ke khilaunoñ kī tarah miltī jaa.e

zehn ḳhvāboñ se tapāñ ho to ġhazal hotī hai

rauzan-e-māh se pichhle pahar ik shoḳh-laqā

jānib-e-di-nigarāñ ho to ġhazal hotī hai

rūh-e-shab apnī adāoñ kī tab-o-tāb liye

ḳhalvat-ārā-e-bayāñ ho to ġhazal hotī hai

ek sayyāl kasak jāda-kushā-e-taḳhlīq

fan kī nabzoñ meñ ravāñ ho to ġhazal hotī hai

tajrabe dard kī shabnam meñ nahā.eñ 'hurmat'

gul-fishāñ sho.ala-e-jāñ ho to ġhazal hotī hai

dil ko taufiq-e-ziyan ho to ghazal hoti hai

zahr-e-gham baada-chukan ho to ghazal hoti hai

fikr tap tap ke nikharti rahe kundan ki tarah

aag sine ki jawan ho to ghazal hoti hai

dhimi dhimi si nawa silsila junban-e-abad

parda-e-jaan mein nihan ho to ghazal hoti hai

dhaDkanen surat-e-alfaz bikharti jaen

dil ma'ani ki zaban ho to ghazal hoti hai

aanch miTTi ke khilaunon ki tarah milti jae

zehn KHwabon se tapan ho to ghazal hoti hai

rauzan-e-mah se pichhle pahar ek shoKH-laqa

jaanib-e-di-nigaran ho to ghazal hoti hai

ruh-e-shab apni adaon ki tab-o-tab liye

KHalwat-ara-e-bayan ho to ghazal hoti hai

ek sayyal kasak jada-kusha-e-taKHliq

fan ki nabzon mein rawan ho to ghazal hoti hai

tajrabe dard ki shabnam mein nahaen 'hurmat'

gul-fishan shoala-e-jaan ho to ghazal hoti hai