dil kya harif ho teri ranjish ke bim ka

dil kyā harīf ho tirī ranjish ke biim kā

tūfān hai charāġh ko jhokā nasīm kā

nazzārgī ko nashsha hai zauq-e-kalīm kā

jalva magar butoñ meñ hai nūr-e-qadīm kā

vo sādgī se pursish-e-ahvāl ab kahāñ

khulnā sitam huā mire hāl-e-saqīm kā

duniyā meñ soz-e-ishq ko paayā sazā-e-ishq

dil ho gayā kanār meñ sho.ala jahīm kā

baiThā uThā rahā hai maze sair-e-charḳh ke

paaya buland hai tire dar ke muqīm kā

mansūr ko milā thā anal-haq se auj-e-dār

bartar huā kalām se rutba kalīm kā

yuuñ be-ḳhabar haqīqat-e-ālam se rah gayā

nashsha thā jām-e-jam meñ dimāġh-e-hakīm kā

ratb-ul-lisāñ hai mauj to gauhar hai tar vahāñ

dariyā muhīt hai tire faiz-e-amīm kā

us hūr-vash se chashm-e-tasavvur hai jalva-zār

nazzāra hai ḳhayāl meñ bāġh-e-na.īm kā

yūsuf se nūr-e-dīda-e-yāqūb thā ravāñ

thā pairahan dikhāne ko parda shamīm kā

gir kar tumhāre kaan se be-āb hai guhar

utrā hai dard-e-hijr se muñh us yatīm kā

ummīd hai ki morid-e-in'ām-e-dost huuñ

juuyā huuñ maiñ vafā kī rah-e-mustaqīm kā

be-yār bazm-e-hastī-e-āshiq hai be-faroġh

dil sho.ala-e-fasurda hai sham.a-e-harīm kā

tamkīn-e-vaz.a-o-tarz-e-tabassum meñ dekhiye

andāz us kī shoḳhī-e-tab.a-e-salīm kā

īmān hai tire ruḳh-e-raushan ko dekhnā

pesh-e-nazar hai mo.ajiza māh-e-do-nīm kā

har dam hai qabz-o-bast tire lutf-o-qahr se

dil aa.ina hai sūrat-e-umīd-o-bīm kā

ādāb kī jagah hai 'zakī' bazm-e-ittihād

nāzuk hai misl-e-shīsha-e-mai dil nadīm kā

dil kya harif ho teri ranjish ke bim ka

tufan hai charagh ko jhoka nasim ka

nazzargi ko nashsha hai zauq-e-kalim ka

jalwa magar buton mein hai nur-e-qadim ka

wo sadgi se pursish-e-ahwal ab kahan

khulna sitam hua mere haal-e-saqim ka

duniya mein soz-e-ishq ko paya saza-e-ishq

dil ho gaya kanar mein shoala jahim ka

baiTha uTha raha hai maze sair-e-charKH ke

paya buland hai tere dar ke muqim ka

mansur ko mila tha anal-haq se auj-e-dar

bartar hua kalam se rutba kalim ka

yun be-KHabar haqiqat-e-alam se rah gaya

nashsha tha jam-e-jam mein dimagh-e-hakim ka

ratb-ul-lisan hai mauj to gauhar hai tar wahan

dariya muhit hai tere faiz-e-amim ka

us hur-wash se chashm-e-tasawwur hai jalwa-zar

nazzara hai KHayal mein bagh-e-naim ka

yusuf se nur-e-dida-e-yaqub tha rawan

tha pairahan dikhane ko parda shamim ka

gir kar tumhaare kan se be-ab hai guhar

utra hai dard-e-hijr se munh us yatim ka

ummid hai ki morid-e-in'am-e-dost hun

juya hun main wafa ki rah-e-mustaqim ka

be-yar bazm-e-hasti-e-ashiq hai be-farogh

dil shoala-e-fasurda hai shama-e-harim ka

tamkin-e-waza-o-tarz-e-tabassum mein dekhiye

andaz us ki shoKHi-e-taba-e-salim ka

iman hai tere ruKH-e-raushan ko dekhna

pesh-e-nazar hai moajiza mah-e-do-nim ka

har dam hai qabz-o-bast tere lutf-o-qahr se

dil aaina hai surat-e-umid-o-bim ka

aadab ki jagah hai 'zaki' bazm-e-ittihad

nazuk hai misl-e-shisha-e-mai dil nadim ka