dil kyun tapan hai kucha-e-dildar dekh kar

dil kyuuñ tapāñ hai kūcha-e-dildār dekh kar

aage baḌhūñgā charḳh kī raftār dekh kar

ḳhush ho sakā na hāl-e-dil-e-zār dekh kar

jaltā hai ġhair merī shab-e-tār dekh kar

samjhe na aap dīda-e-ḳhūñ-bār dekh kar

kyā kījiyegā hāl-e-dil-e-zār dekh kar

sayyād dāġh-e-dil na samajhnā ki chalte vaqt

gulshan ke phuul laayā huuñ do-chār dekh kar

tai kar ke aaj ḳhāna-badoshī kī manzileñ

baiThā huuñ us kā sāya-e-dīvār dekh kar

kuchh kuchh zamāna jaan gayā kār-e-husn-o-ishq

mansūr ko jahān meñ sardār dekh kar

vaqf-e-zabān-e-ahl-e-hasad hai lahū mirā

ḳhush ho rahā huuñ vādī-e-pur-ḳhār dekh kar

patthar nahīñ ki tuur ke daur āzmā.e jaa.eñ

ai barq-e-husn hāl-e-dil-e-zār dekh kar

ab dahr rū-shanā-o-vafā-o-jafā huā

mere gale par aap kī talvār dekh kar

mahshar meñ koī pūchhne vaalā to mil gayā

rahmat baḌhī hai mujh ko gunahgār dekh kar

hai raushnī qafas meñ magar sūjhtā nahīñ

abr-e-siyāh jānib-e-gul-zār dekh kar

rotā huuñ shām-e-ġham meñ dil-e-gum-shuda ko maiñ

yaad aa rahī hai sham-e-shab-tār dekh kar

chaliye magar ḳhayāl rahe umr-e-dahr kā

tham jaa.e āsmāñ na ye raftār dekh kar

rotā huuñ vaqt-e-nāla guzarne se aur bhī

shab ko tulū-e-sub.h ke āsār dekh kar

bas ek din kī baat hai ai ishq-e-lā-zavāl

maiñ kyā karūñgā misr kā bāzār dekh kar

kyā thā ki aise vaqt meñ sāhab-dilān-e-hashr

dekhā kiye mujhe tirī talvār dekh kar

sad-chāk dil kā zikr na bhūlā maiñ der meñ

tasbīh yaad aa ga.ī zunnār dekh kar

TuuTe haiñ shīsha-hā-e-dil itne ki ahl-e-dard

rakhte haiñ paañv ḳhaak pe sau baar dekh kar

sayyād kis jagah pe qafas hai ki dil mirā

dar ho rahā hai baaġh kī dīvār dekh kar

in dostoñ meñ vo na hoñ yārab jo vaqt-e-dīd

bīmār ho ga.e ruḳh-e-bīmār dekh kar

vo kyā samajh sakeñge nasheb-o-farāz-e-dahr

jo chal rahe haiñ raah ko hamvār dekh kar

kahte haiñ dil-lagī mirī shām-e-firāq ko

achchhā yūñhī sahī magar ik baar dekh kar

'sāqib' ajab nahīñ ki sar-e-tūr-e-imtihāñ

ġhash dil ko aa.e jalva-e-ash.ār dekh kar

dil kyun tapan hai kucha-e-dildar dekh kar

aage baDhunga charKH ki raftar dekh kar

KHush ho saka na haal-e-dil-e-zar dekh kar

jalta hai ghair meri shab-e-tar dekh kar

samjhe na aap dida-e-KHun-bar dekh kar

kya kijiyega haal-e-dil-e-zar dekh kar

sayyaad dagh-e-dil na samajhna ki chalte waqt

gulshan ke phul laya hun do-chaar dekh kar

tai kar ke aaj KHana-badoshi ki manzilen

baiTha hun us ka saya-e-diwar dekh kar

kuchh kuchh zamana jaan gaya kar-e-husn-o-ishq

mansur ko jahan mein sardar dekh kar

waqf-e-zaban-e-ahl-e-hasad hai lahu mera

KHush ho raha hun wadi-e-pur-KHar dekh kar

patthar nahin ki tur ke daur aazmae jaen

ai barq-e-husn haal-e-dil-e-zar dekh kar

ab dahr ru-shana-o-wafa-o-jafa hua

mere gale par aap ki talwar dekh kar

mahshar mein koi puchhne wala to mil gaya

rahmat baDhi hai mujh ko gunahgar dekh kar

hai raushni qafas mein magar sujhta nahin

abr-e-siyah jaanib-e-gul-zar dekh kar

rota hun sham-e-gham mein dil-e-gum-shuda ko main

yaad aa rahi hai sham-e-shab-tar dekh kar

chaliye magar KHayal rahe umr-e-dahr ka

tham jae aasman na ye raftar dekh kar

rota hun waqt-e-nala guzarne se aur bhi

shab ko tulu-e-subh ke aasar dekh kar

bas ek din ki baat hai ai ishq-e-la-zawal

main kya karunga misr ka bazar dekh kar

kya tha ki aise waqt mein sahab-dilan-e-hashr

dekha kiye mujhe teri talwar dekh kar

sad-chaak dil ka zikr na bhula main der mein

tasbih yaad aa gai zunnar dekh kar

TuTe hain shisha-ha-e-dil itne ki ahl-e-dard

rakhte hain panw KHak pe sau bar dekh kar

sayyaad kis jagah pe qafas hai ki dil mera

dar ho raha hai bagh ki diwar dekh kar

in doston mein wo na hon yarab jo waqt-e-did

bimar ho gae ruKH-e-bimar dekh kar

wo kya samajh sakenge nasheb-o-faraaz-e-dahr

jo chal rahe hain rah ko hamwar dekh kar

kahte hain dil-lagi meri sham-e-firaq ko

achchha yunhi sahi magar ek bar dekh kar

'saqib' ajab nahin ki sar-e-tur-e-imtihan

ghash dil ko aae jalwa-e-ashaar dekh kar