dil laga kar paDhai karte rahe

dil lagā kar paḌhā.ī karte rahe

umr bhar imtihāñ se Darte rahe

ek adnā savāb kī ḳhātir

jaane kitne gunāh karte rahe

jaan par kaun dam nahīñ detā

sūrat aisī thī log marte rahe

koī bhī raah par nahīñ aayā

hādse hī yahāñ guzarte rahe

hairateñ hairatoñ pe vārafta

jhiil meñ Dūbte ubharte rahe

āḳhirash ham bhī itnā suukh ga.e

log dariyā ko paar karte rahe

kyā na thā is jahān meñ āḳhir

ham bhī kyā hī talāsh karte rahe

āḳhir ezaaz us ne baḳhsh diyā

kaisā ḳhud ko zalīl karte rahe

dil laga kar paDhai karte rahe

umr bhar imtihan se Darte rahe

ek adna sawab ki KHatir

jaane kitne gunah karte rahe

jaan par kaun dam nahin deta

surat aisi thi log marte rahe

koi bhi rah par nahin aaya

hadse hi yahan guzarte rahe

hairaten hairaton pe warafta

jhil mein Dubte ubharte rahe

aaKHirash hum bhi itna sukh gae

log dariya ko par karte rahe

kya na tha is jahan mein aaKHir

hum bhi kya hi talash karte rahe

aaKHir ezaz us ne baKHsh diya

kaisa KHud ko zalil karte rahe