dil lagana chahiye chal kar kisi haiwan se

dil lagānā chāhiye chal kar kisī haivān se

darj.hā behtar haiñ ye is daur ke insān se

barkateñ jo uTh ga.ī haiñ aaj dastar-ḳhvān se

mezbāñ Darne lage haiñ āmad-e-mehmān se

fasl boī jā.egī sunte haiñ ab mirrīḳh par

dūriyāñ yuuñ baḌh rahī haiñ khet se khaliyān se

kar liyā hai sab ne jaa.ez har amal is khel meñ

garm rakkheñge siyāsat jhuuT se bohtān se

sard hogī ek din ye ātish-e-namrūd bhī

bārhā guzre haiñ ham is karb ke tūfān se

vaqt kī raftār ne sab kā badal Daalā mizāj

shā.erī bhī ho rahī hai ab na.e unvān se

mulk se rishta hamārā hai kuchh aisā hī 'atīq'

jism kā jaise huā kartā hai rishta jaan se

dil lagana chahiye chal kar kisi haiwan se

darjha behtar hain ye is daur ke insan se

barkaten jo uTh gai hain aaj dastar-KHwan se

mezban Darne lage hain aamad-e-mehman se

fasl boi jaegi sunte hain ab mirriKH par

duriyan yun baDh rahi hain khet se khaliyan se

kar liya hai sab ne jaez har amal is khel mein

garm rakkhenge siyasat jhuT se bohtan se

sard hogi ek din ye aatish-e-namrud bhi

barha guzre hain hum is karb ke tufan se

waqt ki raftar ne sab ka badal Dala mizaj

shaeri bhi ho rahi hai ab nae unwan se

mulk se rishta hamara hai kuchh aisa hi 'atiq'

jism ka jaise hua karta hai rishta jaan se