dil lagane ki jagah aalam-e-ijad nahin

dil lagāne kī jagah ālam-e-ījād nahīñ

ḳhvāb āñkhoñ ne bahut dekhe magar yaad nahīñ

aaj asīroñ meñ vo hañgāma-e-fariyād nahīñ

shāyad ab koī gulistāñ kā sabaq yaad nahīñ

sar-e-shorīda salāmat hai magar kyā kahiye

dast-e-farhād nahīñ tesha-e-farhād nahīñ

tauba bhī bhuul ga.e ishq meñ vo maar paḌī

aise ausān ga.e haiñ ki ḳhudā yaad nahīñ

dushman o dost se ābād haiñ donoñ pahlū

dil salāmat hai to ghar ishq kā barbād nahīñ

fikr-e-imroz na andesha-e-fardā kī ḳhalish

zindagī us kī jise maut kā din yaad nahīñ

nik.hat-e-gul kī hai raftār havā kī pāband

ruuh qālib se nikalne pe bhī āzād nahīñ

zinda haiñ murda-parastoñ meñ abhī tak 'ġhālib'

magar ustād 'yagānā' sā ab ustād nahīñ

dil lagane ki jagah aalam-e-ijad nahin

KHwab aankhon ne bahut dekhe magar yaad nahin

aaj asiron mein wo hangama-e-fariyaad nahin

shayad ab koi gulistan ka sabaq yaad nahin

sar-e-shorida salamat hai magar kya kahiye

dast-e-farhad nahin tesha-e-farhad nahin

tauba bhi bhul gae ishq mein wo mar paDi

aise ausan gae hain ki KHuda yaad nahin

dushman o dost se aabaad hain donon pahlu

dil salamat hai to ghar ishq ka barbaad nahin

fikr-e-imroz na andesha-e-farda ki KHalish

zindagi us ki jise maut ka din yaad nahin

nikhat-e-gul ki hai raftar hawa ki paband

ruh qalib se nikalne pe bhi aazad nahin

zinda hain murda-paraston mein abhi tak 'ghaalib'

magar ustad 'yagana' sa ab ustad nahin