دل لگانے کی سر عام سزا دیتا ہے

دل لگانے کی سر عام سزا دیتا ہے

عشق انسان کو مجنوں سا بنا دیتا ہے

گر کوئی چیز مقدر میں نہیں ہوتی تو

اس کی رغبت کو خدا دل سے ہٹا دیتا ہے

میری تحقیر کیے جاتے ہیں میرے اپنے

اک یہی غم ہے مرا دل جو دکھا دیتا ہے

تو مجھے موت کے دروازے پہ لے آیا جب

کس لیے پیار سے جینے کی دعا دیتا ہے

بس کئے جاتا ہے تکذیب مگر اس کے بعد

نرم لہجے سے وہ ارمان جگا دیتا ہے

یوں تو کہتا ہے مجھے دوست مگر اس کے بعد

مجھ کو احباب کی نظروں میں گرا دیتا ہے

اس سے روداد الم کہنا عبث ہے شمسہؔ

قصۂ درد ہنسی میں وہ اڑا دیتا ہے