dil lagane ki sar-e-am saza deta hai

dil lagāne kī sar-e-'ām sazā detā hai

'ishq insān ko majnūñ sā banā detā hai

gar koī chiiz muqaddar meñ nahīñ hotī to

us kī raġhbat ko ḳhudā dil se haTā detā hai

merī tahqīr kiye jaate haiñ mere apne

ik yahī ġham hai mirā dil jo dukhā detā hai

tū mujhe maut ke darvāze pe le aayā jab

kis liye pyaar se jiine kī du'ā detā hai

bas kiye jaatā hai takzīb magar is ke baa'd

narm lahje se vo armān jagā detā hai

yuuñ to kahtā hai mujhe dost magar us ke baa'd

mujh ko ahbāb kī nazroñ meñ girā detā hai

us se rūdād-e-alam kahnā 'abas hai 'shamsa'

qissa-e-dard hañsī meñ vo uḌā detā hai

dil lagane ki sar-e-'am saza deta hai

'ishq insan ko majnun sa bana deta hai

gar koi chiz muqaddar mein nahin hoti to

us ki raghbat ko KHuda dil se haTa deta hai

meri tahqir kiye jate hain mere apne

ek yahi gham hai mera dil jo dukha deta hai

tu mujhe maut ke darwaze pe le aaya jab

kis liye pyar se jine ki du'a deta hai

bas kiye jata hai takzib magar is ke ba'd

narm lahje se wo arman jaga deta hai

yun to kahta hai mujhe dost magar us ke ba'd

mujh ko ahbab ki nazron mein gira deta hai

us se rudad-e-alam kahna 'abas hai 'shamsa'

qissa-e-dard hansi mein wo uDa deta hai