dil lage dil-lagi nahin hoti

dil lage dil-lagī nahīñ hotī

kisī sūrat se bhī nahīñ hotī

jis meñ koī ġharaz ho poshīda

dosto dostī nahīñ hotī

haa.e kaisā hai mulk mulk-e-‘adam

jā ke phir vāpsī nahīñ hotī

lab pe rahtī thī jin kī har dam baat

un se ab baat bhī nahīñ hotī

log kahte haiñ zaḳhm ko ḳhandāñ

us pe bhī ye hañsī nahīñ hotī

yuuñ to taqdīr se haiñ sab bebas

'ishq sī bebasī nahīñ hotī

vo jo Dartī hai maut se paiham

zindagī zindagī nahīñ hotī

kisī pahlū bhī kal nahīñ paḌtī

'ishq sī bekalī nahīñ hotī

un ke dil meñ na ulfat-o-nafrat

jin ke dil meñ duī nahīñ hotī

husn-e-mā’sūm yuuñ na khul khele

khul jo khelī kalī nahīñ hotī

ham bahakte kabhī na yuuñ saaqī

tere hāthoñ jo pī nahīñ hotī

ham ki bande se ho ga.e āzād

ham se ab bandagī nahīñ hotī

dil lage dil-lagi nahin hoti

kisi surat se bhi nahin hoti

jis mein koi gharaz ho poshida

dosto dosti nahin hoti

hae kaisa hai mulk mulk-e-‘adam

ja ke phir wapsi nahin hoti

lab pe rahti thi jin ki har dam baat

un se ab baat bhi nahin hoti

log kahte hain zaKHm ko KHandan

us pe bhi ye hansi nahin hoti

yun to taqdir se hain sab bebas

'ishq si bebasi nahin hoti

wo jo Darti hai maut se paiham

zindagi zindagi nahin hoti

kisi pahlu bhi kal nahin paDti

'ishq si bekali nahin hoti

un ke dil mein na ulfat-o-nafrat

jin ke dil mein dui nahin hoti

husn-e-ma’sum yun na khul khele

khul jo kheli kali nahin hoti

hum bahakte kabhi na yun saqi

tere hathon jo pi nahin hoti

hum ki bande se ho gae aazad

hum se ab bandagi nahin hoti