dil-lagi karne se ye dil kahan mana hota

dil-lagī karne se ye dil kahāñ maanā hotā

tum na milte to kahīñ aur Thikānā hotā

apnī marzī ke muāfiq jo fasāna hotā

vo bhī duniyā ke mutābiq hī sunānā hotā

kaash TuuTī huī kashtī ke khevayyā bante

ham ko dariyā ke kisī paar to jaanā hotā

ye koī bhūlī kahānī hai jo yaad aatī hai

aisī hālat meñ koī dost purānā hotā

dil-e-betāb hameñ zabt se mahrūm na kar

mar na jaate jo tirī baat meñ aanā hotā

tum ko bas chāhne bhar se koī kyoñ mil jaa.e

aise to sab kī hī muTThī meñ zamāna hotā

ajnabī thā so taġhāful bhī nahīñ kar paa.e

rabt hotā to bichhaḌne kā bahāna hotā

Thiik hī hai ki ye duniyā na kabhī dekhe hameñ

us se dekhā nahīñ jā.egā dīvāna hotā

dil-lagi karne se ye dil kahan mana hota

tum na milte to kahin aur Thikana hota

apni marzi ke muafiq jo fasana hota

wo bhi duniya ke mutabiq hi sunana hota

kash TuTi hui kashti ke khewayya bante

hum ko dariya ke kisi par to jaana hota

ye koi bhuli kahani hai jo yaad aati hai

aisi haalat mein koi dost purana hota

dil-e-betab hamein zabt se mahrum na kar

mar na jate jo teri baat mein aana hota

tum ko bas chahne bhar se koi kyon mil jae

aise to sab ki hi muTThi mein zamana hota

ajnabi tha so taghaful bhi nahin kar pae

rabt hota to bichhaDne ka bahana hota

Thik hi hai ki ye duniya na kabhi dekhe hamein

us se dekha nahin jaega diwana hota