dil mahw-e-tamasha-e-lab-e-baam nahin hai

dil mahv-e-tamāshā-e-lab-e-bām nahīñ hai

paiġhām ba-andāz-e-paiġhām nahīñ hai

ai jān-e-girāñ sair tirā rahbar-o-rahzan

hai kaun agar vaqt-e-subuk-e-gām nahīñ hai

jo tere dayār-e-ruḳh-o-kākul meñ na guzre

vo sub.h nahīñ hai vo mirī shaam nahīñ hai

is pursish-e-hālāt ke andāz ke qurbāñ

kis tarah kahūñ maiñ mujhe ārām nahīñ hai

kyā baat hai ai talḳhī-e-āzār-e-mohabbat

fihrist-e-shahīdāñ meñ mirā naam nahīñ hai

mai-ḳhāne meñ aur shorish-e-ayyām dar aa.e

afsos ki hāthoñ meñ mire jaam nahīñ hai

aksar lab-e-shā.ir se jo suntā hai zamāna

vo ziist kī āvāz hai ilhām nahīñ hai

ai mast-e-mai-shauq sambhāl apne subū ko

duniyā hai ye ḳhum-ḳhāna-e-ḳhayyām nahīñ hai

ik turfa tamāshā hai 'nazar' terī tabī.at

shā.ir bhī hai aur shahr meñ badnām nahīñ hai

dil mahw-e-tamasha-e-lab-e-baam nahin hai

paigham ba-andaz-e-paigham nahin hai

ai jaan-e-giran sair tera rahbar-o-rahzan

hai kaun agar waqt-e-subuk-e-gam nahin hai

jo tere dayar-e-ruKH-o-kakul mein na guzre

wo subh nahin hai wo meri sham nahin hai

is pursish-e-haalat ke andaz ke qurban

kis tarah kahun main mujhe aaram nahin hai

kya baat hai ai talKHi-e-azar-e-mohabbat

fihrist-e-shahidan mein mera nam nahin hai

mai-KHane mein aur shorish-e-ayyam dar aae

afsos ki hathon mein mere jam nahin hai

aksar lab-e-shair se jo sunta hai zamana

wo zist ki aawaz hai ilham nahin hai

ai mast-e-mai-shauq sambhaal apne subu ko

duniya hai ye KHum-KHana-e-KHayyam nahin hai

ek turfa tamasha hai 'nazar' teri tabiat

shair bhi hai aur shahr mein badnam nahin hai